ភ្នំពេញៈ កាលពីវេលាម៉ោង២ៈ៣០នាទីរំលងអធ្រាត្រ ឈានចូលថ្ងៃទី០១ ខែកញ្ញា ឆ្នាំ២០១៨ នៅចំណុចផ្ទះលេខ២៣ ផ្លូវលេខ១១៣ កែងផ្លូវ៤០៤ ស្ថិតក្នុងសង្កាត់បឹងកេងកងទី២ ខណ្ឌចំការមន។ ជនសង្ស័យជាអ្នកបើករថយន្តតាក់ស៊ីម្នាក់ មានឈ្មោះ ប៊ុន ម៉ៅ មុខរបរ អ្នកបើកបររថយន្តតាក់ស៊ី ឱ្យក្រុមហ៊ុន PassApp។ បានដឹកភ្ញៀវជាជនបរទេសមានឈ្មោះ សា កូស៊ី កាដូយ៉ា ភេទប្រុស អាយុ៤៣ឆ្នាំ ជនជាតិជប៉ុន ស្នាក់នៅផ្ទះលេខ២៣ ផ្លូវលេខ១១៣ កែង៤០៤ សង្កាត់បឹងកេងកងទី២ ខណ្ឌចំការមន។ ចេញពីហាងផឹកស៊ីមួយកន្លែង លុះដល់គោលដៅ ឃើញជនរងគ្រោះជាភ្ញៀវ មានលុយច្រើនជាប់ខ្លួន ក៏វាយប្លន់បានប្រាក់ជាង១ម៉ឺនដុល្លារ រួចព្យាយាមរត់គេចខ្លួន។ លុះក្រោយពីស្រាវជ្រាវអស់រយៈពេល៦ថ្ងៃ ទីបំផុតសមត្ថកិច្ចក៏ឈានដល់ការឃាត់ខ្លួនមុខសញ្ញាជនសង្ស័យ បានកាលពីថ្ងៃទី០៦ ខែកញ្ញា ឆ្នាំ២០១៨ នាំយកមកធ្វើការសាកសួរ។

លោកវរសេនីយ៍ឯក ជីវ វិបុល នាយការិយាល័យព្រហ្មទណ្ឌកម្រិតធ្ងន់ បានបញ្ជាក់ប្រាប់ថា ការបង្ក្រាបខាងលើនេះ ធ្វើឡើងកាលពីថ្ងៃទី០៦ ខែកញ្ញា ឆ្នាំ២០១៨ ដោយបានឃាត់ខ្លួនជនសង្ស័យម្នាក់ឈ្មោះ ប៊ុន ម៉ៅ មកធ្វើការសាកសួរនៅនាយកដ្ឋាននគរបាលព្រហ្មទណ្ឌ។ ជាមួយនេះកម្លាំងនគរបាល បានដកហូតវត្ថុតាង រថយន្តមួយគ្រឿង ម៉ាកកាម៉ារី បាឡែន ពណ៌ទឹកមាស ស៊េរីឆ្នាំ២០០២ ពាក់ស្លាកលេខភ្នំពេញ 1I-7731។ ក្រៅពីនោះសមត្ថកិច្ចក៏បានដកហូត ទូរស័ព្ទដៃចំនួន២គ្រឿង រួមនឹងប្រាក់ចំនួន៩៨០០ដុល្លារផងដែរ។ តាមសម្តីបុរសរងគ្រោះបានរៀបរាប់ប្រាប់ថា នៅមុនពេលកើតហេតុ កាលពីវេលាម៉ោង៦ព្រលប់ ថ្ងៃទី៣១ ខែសីហាឆ្ នាំ២០១៨ ខ្លួនបានជិះម៉ូតូកង់បីជាមួយមិត្តភក្តិ ទៅស៊ីផឹកនៅហាងមួយកន្លែង យីហោ "មីយ៉ាមិ" ក្នុងសង្កាត់ទន្លេបាសាក់ ខណ្ឌចំការមន។ រហូតដល់ម៉ោង២រំលងអធ្រាត្រឈានចូលថ្ងៃទី០១ ខែកញ្ញា ពេលចេញពីផឹកស៊ីវិញ ខ្លួនមិនបានជិះម៉ូតូកង់បីត្រឡប់មកវិញទេ តែបានហៅតាក់ស៊ី PassApp ជិះសំដៅមកផ្ទះវិញ។ មួយសន្ទុះក្រោយមក ខ្លួនឃើញជនសង្ស័យបើករថយន្ត មកទទួលខ្លួនហើយជិះសំដៅទៅកន្លែងស្នាក់នៅ។ ជនរងគ្រោះបានបន្តថា លុះពេលទៅដល់ផ្ទះ ខ្លួនក៏បានដកប្រាក់ចំនួន៥ដុល្លារ ឱ្យថ្លៃតាក់ស៊ីស្រាប់តែភ្លាមៗនោះអ្នកបើកតាក់ស៊ី ដែលជាជនសង្ស័យឃើញខ្លួនមានលុយច្រើន ក៏ប្រតាយប្រតប់ទាញយកកាបូបលុយពីខ្លួនហើយក៏លូកយកប្រាក់អស់ចំនួន១ម៉ឺនដុល្លារ រួចឡើងជិះរថយន្តគេចខ្លួនបាត់។ ដោយឡែកនៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពខាងលើមែន ដោយបានប្លន់យកប្រាក់ចំនួន១ម៉ឺនដុល្លារ ពីជនរងគ្រោះ។ លុះក្រោយធ្វើសកម្មភាពរួចខ្លួនបានបើករថយន្តគេចទៅផ្ទះ ហើយយកប្រាក់ទៅលាក់ទុក រហូតក៏ត្រូវសមត្ថកិច្ចចាប់ខ្លួនបានតែម្តង៕