បន្ទាប់ពីបានឃើញរឿងរ៉ាវជាច្រើន ព្រមទាំងបានដឹងពីរឿងរ៉ាវរបស់ប្អូនស្រីម្នាក់ ដែលត្រូវឪពុកបង្កើតចាប់រំលោភរហូតដល់មានផ្ទៃពោះ និងរងទារុណកម្មយ៉ាងព្រៃផ្សៃនោះ ម្ចាស់គណនីហ្វេសប៊ុកមួយដែលមានឈ្មោះថា Ratana Chan បានចេញកំណាព្យ ចាក់ដោតចិត្តប្រិយមិត្ត ក៏ដូចជាឪពុកទូទៅ កុំព្រោះតែតណ្ហាមួយឆាវ បំផ្លាញអនាគតកូនស្រី ដោយកំដាប់ដៃរបស់ខ្លួនទាំងព្រៃផ្សៃបែបនេះ។ រត្តនា បានរៀបរាប់ទាំងក្តីឈឺចាប់តាមរយៈកំណាព្យថា ៖

ឳអនិច្ចា [...] ទឹកភ្នែកកូនស្រី ស្រក់គ្មានប្រណី ព្រោះពុកតិរច្ឆាន រំលោភបំពាន គ្មានពេលស្រាកស្រាន្ត កូនស្ទើខ្ស័យប្រាណ រហូតមានផ្ទៃ។ ព្រោះតែតណ្ហា ពុកគ្មានមេត្តា ដល់ចិត្តកូនស្រី ទោះកូនអង្វរ លន់តួរម្តេចក្តី ក៏ពុកអប្រីយ មិនដោះលែងឡើយ។ តើអោយកូនស្រី រស់នៅយ៉ាងណា រស់ក្នុងលោកា អសោចអប្រីយ រស់ឈ្មោះជាស្រីតែកម្មចង្រៃ ប្រហារទាំងរស់។ រស់ប្រៀបដូចស្លាប់ រស់ក្នុងភាពស្អប់ រងការនិន្ទា ភូមិផងមើលងាយ មានគេរើសអើង គ្មានអ្នកតម្កើង ព្រោះជនរងគ្រោះ។ តើមានអ្នកណា នឹងស្ម័ក្ររក្សា កូនទៅថ្ងៃមុខ តើមានអ្នកណា ព្រមដើរឆ្លងភព កាន់ដៃរូបកូន ទៅរកមង្គល។ តើពុកដឹងទេ ពុកបានបំផ្លាញ អនាគតកូនស្រី អោយធ្លាក់នរក ភក់ជ្រាំអវជី ដោយស្នាដៃលោក អ្នកមានគុណក្រៃ។ ឯណាទៅពាក្យ លោកពុកមានគុណ ធ្ងន់លើសប្រីថពី ពុកបែធ្វើបាប វាយវាត់វក់វី ចិត្តកាយខ្ទេចខ្ទី ដូចធ្លាក់នរក។ ឱទេវត្តាអើយ តើខ្ញុំខុសអ្វី មេ្តចមិនប្រណី ដល់រូបខ្ញុំផង ខ្ញុំគ្រាន់ចង់រស់ មានពុកមានម៉ែ ថ្នមបំពេរថែរ ដូចកូនដទៃ។ រូបខ្ញុំសូមផ្តាំ បុរសទាំងឡាយ ជាពុកគេហើយ សូមអ្នកមេត្តា ស្រលាញ់ថ្នាក់ថ្នម បីបមបុត្រផ្ញា ដល់លុះអវសាន្ត។ សូមកុំស្រលាញ់ រូបកាយនេបណិត ហើយមានគំនិត ក្បត់ផិតភរិយា ទៅរំលោភកូន ព្រោះទោសមិនស្រាល ទោះអ្នកស្លាប់សូន្យ។ អារម្មណ៏មួយដែលមនុស្សមួយចំនួនក្នុងលោកមិនងាយយល់ ហើយថែមទាំងដាក់បន្ទុកនិងរើសអើងជនរងគ្រោះ។ ហើយក៏សូមអរគុណដល់អ្នកដែលតែងតែលើកទឹកចិត្តនិងអាណិតស្រលាញ់ជនរងគ្រោះ ខ្ញុំសង្ឃឹមថាមនុស្សក្នុងលោកនឹងយល់ ព្រមទាំងអោយតម្លៃលើជនរងគ្រោះ។ សូមមេត្តាលុបបំបាត់ករណីរំលោភសេពសន្ថវៈ លើស្រី កុមារី និងកូនស្រីរបស់អ្នក????។ ប្រភព៖ Ratana Chan