យល់យ៉ាងណាដែរ...លោក វិល្លាម ស្នើសុំរដ្ឋាភិបាលសង់ស្ដូបមិត្តរូបតំណាងសពលោកវេជ្ជបណ្ឌិត បេអាត រិចឆ្នឺ ដែលបានជួួយជ្រោមជ្រែងអាយុជីវិតកុមារកម្ពុជា

ជារឿងគួរអោយសោកស្ដាយបំផុតនៅពេលបានទទួលដំណឹងថា លោក វេជ្ជបណ្ឌិតចិត្តធម៌ បេអាត រិចឆ្នឺ ដែលបានលះបង់កម្លាំងកាយចិត្តទាំងគ្មានគិតប្រយោជន៍តបស្នងជួយជីវិតកុមារកម្ពុជាបានទទួលមរណភាព ។

ដំណឹងនេះធ្វើអោយប្រជាជនកម្ពុជារន្ធត់ និងសោកស្ដាយក្រៃលែងដោយមិនចង់បាត់បង់លោកវេជ្ជបណ្ឌិតឡើយ ។ ក្នុងនោះដែរ ប្រធានគណបក្សខ្មែរក្រោកលោក វិល្លាម ក៏បានបង្ហាញនូវក្ដីសោកស្ដាយផងដែរព្រមទាំងស្នើសុំរដ្ឋាភិបាលសង់ស្ដូបមិត្តរូបតំណាងសពលោកវេជ្ជបណ្ឌិត បេអាត រិចឆ្នឺ ទៀតផង ។

នៅថ្ងៃទី១០ កញ្ញា នេះលោក វិល្លាម បានបង្ហោះសារលើបណ្ដាញសង្គមរបស់លោកថា៖ «ដេីម្បីជាកិច្ចឆ្លេីយតបចំពោះ គុណឧបការៈ និងការលះបង់របស់ លោក វេជ្ជបណ្ឌិត បេអាត រិចឆ្នឺ ស្ថាបនិកមន្ទីពេទ្យគន្ធបុប្ផា ដែលបានលះបង់កម្លាំងកាយ កំឡាំងចិត្ត ពេលវេលាប្រកបដោយភាពមនុស្សធម៌ដ៏ខ្ពង់ខ្ពស់ក្នុងបេសកកម្មជិត៣០ឆ្នាំមកនេះក្រោមការដឹកនាំរបស់លោកវេជ្ជបណ្ឌិត ពេទ្យមនុស្សធម៌គន្ធបុផ្ផាបានព្យាបាលកុមារកម្ពុជាមិនក្រោម១៥លាននាក់ និងបានសង្គ្រោះជំងឺធ្ងន់ជាង២លាននាក់នោះទេ

ដូចនេះខ្ញុំសូមស្នេីររាជរដ្ឋាភិបាលមេត្តារៀបចំចាត់ចែងអោយសាងសង់នូវ ស្តូបនិមិត្តរូបតំណាងអោយ សព នៃ លោកវេជ្ជបណ្ឌិត បេអាត រិចឆ្នឺ សម្រាប់អោយកុមារកម្ពុជាបានចងចាំនិងគោរពដឹងគុណចំពោះ វេជ្ជបណ្ឌិតទេវតារូបនេះ ។»