ភ្នំពេញ៖ បុរសពីរនាក់បានធ្វើដំណើរក្នុងរថយន្តរួមគ្នាទាំងស្ថានភាពស្រវឹងស្រា ហើយក៏បានរេចង្កូតទៅបុករបាំងថ្មពុះចែកទ្រូងផ្លូវ បណ្ដាលឲ្យរបាំងថ្មបាក់អស់មួយកំណាត់និងធ្វើឲ្យរថយន្ដរងការខូចខាតយ៉ាងដំណំផងដែរ។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១២ និង ២០នាទី រំលងអាធាត្រ ឈានចូលនៅថ្ងៃទី ១១ ខែកញ្ញា ឆ្នាំ២០១៨ ស្ថិតនៅតាមបណ្ដោយផ្លូវជាតិលេខ២ ក្នុងសង្កាត់ចាក់អង្រែក្រោមខណ្ឌមាជ័យ រាជធានីភ្នំពេញ។ យោងតាមប្រភពព័ត៌មានពីប្រជាពលរដ្ឋបានឲ្យដឹងថាមុខពេលកើតហេតុគេឃើញមានរថយន្ដម៉ាក កូរ៉ូឡា ដែលពាក់ស្លាកលេខ កណ្ដាល 2A-3221 បានធ្វើដំណើរតាមបណ្ដោយផ្លូវជាតិលេខ២ ទិសដៅពីជើងមកត្បូងក្នុងល្បឿនលឿង រួមទាំងអ្នកបើកបរស្រវឹងផង ក៏បានរេចង្កូតទៅបុកជាមួយនិងក្បាលនាគពុះចែកទ្រូងផ្លូវបណ្ដាលឲ្យបាក់អស់មួយកង់ ឯរថយន្ដបង្ករងការខូចខាតផ្នែកខាងមុខយ៉ាងដំណំ ចំណែកឯបុរសពីនាក់ជាម្ចាស់រថយន្ដ និងអ្នករួមដំណើរមិនបានរងរបួសធ្ងន់ធ្ងរនោះទេ ។ ក្រោយពេលកើតហេតុ សមត្ថកិច្ចមូលដ្ឋានតាមចុះដល់កន្លែងកើតហេតុ និងទាក់ទងទៅជំនាញចរារណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីធ្វើការវាស់វែងយករថយន្ដបង្កទៅរក្សាទុករង់ចាំដោះស្រាយទៅតាមផ្លូវច្បាប់៕