ភ្នំពេញ៖ បុរសជាជនជាតិកូរ៉េម្នាក់បើករថយន្តលុចសុីស RX300 មួយគ្រឿងលឿនពេកចាប់ហ្រ្វាំងមិនទាន់ជ្រុលចង្កូតទៅបុករថយន្តមួយគ្រឿងកំពុងបត់ឆ្វេងដៃចូលបូរីសែនសុខពេញទំហឹង បណ្តាលឲ្យរថយន្តបង្ករេចង្កូតទៅបុកចូលផ្ទះជួសជុលម៉ូតូរងការខូចខាតយ៉ាងដំណំ សំណាងល្អមិនបង្កឲ្យមានអ្នករងរបួស។

ហេតុការណ៍នេះដែរ បានកើតឡើងកាលពីវេលាម៉ោង២យប់រំលងអធ្រាត្រឈានចូល ថ្ងៃអង្គារ ទី១១ ខែកញ្ញា ឆ្នាំ២០១៨ ស្ថិតនៅចំណុចមុខបូរីសែនសុខ តាមបណ្តោយផ្លូវ៥៩៨ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសជនជាតិកូរ៉េម្នាក់បើករថយន្តមួយគ្រឿងម៉ាកលុចសុីសRX300ពណ៌ស ពាក់ស្លាកលេខភ្នំពេញ2S-0402ទិសដៅពីត្បូងទៅជើង លុះមកដល់ចំណុចកើតហេតុខាងលើក៍មានរថយន្តមួយគ្រឿងទៀត ម៉ាកកាមរីហាយប្រីតពណ៌ស ពាក់ស្លាកលេខភ្នំពេញ2AE-1680បើកបរដោយបុរសម្នាក់រួមដំណើរនិងបុរសម្នាក់ទៀតនៅពីមុខស្របទិសគ្នា ហើយក៏បត់ឆ្វេងដៃចូលបូរីសែនសុខ ដោយរថយន្តដែលបើកមកពីក្រោយចាប់ហ្វ្រាំងមិនទាន់ជ្រុលចង្កូចទៅបុកចំហៀងទ្វាខាងមុខខាងឆ្វេងពេញទំហឹងបណ្តាលខូចខាតយ៉ាងដំណំ ចំណែករថយន្តបង្កបានរេចង្កូតមកខាងឆ្វេងដៃជ្រុលទៅបុកផ្ទះជួសជុលម៉ូតូខូចខាតជញ្ជាំងផ្នែកខាងមុខបន្ថែមទៀតរងការខូចខាតផ្នែកខាងមុខយ៉ាងដំណំ។ ក្រោយកើតហេតុ សមត្ថកិច្ចបានចុះមកដល់កន្លែងកើតហេតុ និងបានឲ្យភាគីទាំងសងខាងសម្របសម្រួលគ្នា ដោយភាគីម្ចាស់រថយន្តបង្កជាជនជាតិកូរ៉េកបានចេញសំណងទៅម្ចាស់រថយន្តរងគ្រោះចំនួន២០០០ដូល្លារ និងចេញសំណងទៅឲ្យម្ចាស់ផ្ទះជួលជុលម៉ូតូចំនួន២៥០ដុល្លាដើម្បីបញ្ចប់រឿងនៅនិងកន្លែងកើតហេតុ៕