ភ្នំពេញៈ កាលពី​វេលា​ម៉ោង១០ៈ៣០នាទីយប់ ​ថ្ងៃទី១០ ខែកញ្ញា ឆ្នាំ២០១៨នេះ នៅត្រង់ចំណុច​ផ្លូវបែក​ជា​បួន ផ្លូវ៣៣៧ កែង​ផ្លូវ៥២៨ ស្ថិតក្នុង​សង្កាត់​បឹងកក់​ទី១ ខណ្ឌទួលគោក រាជធានី​ភ្នំពេញ។ មានករណីគ្រោះថ្នាក់ចរាចរណ៏មួយ ដោយនារី​ជនជាតិ​ចិន​រូប​ស្រស់​ម្នាក់បើករថយន្ត​ស៊េរី​ទំនើបម៉ាក Mazda ក្នុង​ល្បឿន​យ៉ាង​លឿន​ ជ្រុលចង្កូតទៅបុក​ជាមួយ​រថយន្ត​ស៊េរី​ទំនើប Range Rover ចំ​ពេញទំហឹង បណ្តាល​ឲ្យ​រង​ការខូចខាត​ខ្ទេច​ស្ទើរ​ទាំងស្រុង រីឯ​រថយន្ត Mazda ខូចខាត​ផ្នែក​ខាងមុខ​យ៉ាងដំណំ។

នៅ​មុនពេល​កើតហេតុ គេ​ឃើញ​រថយន្ត​ស៊េរី​ទំនើប​មួយគ្រឿង​ម៉ាក Range Rover ពណ៌​ស ពាក់​ស្លាក​លេខ ភ្នំពេញ 2AP-7736 បើកបរ​ដោយ​បុរស​ម្នាក់ ធ្វើដំណើរ​តាម​បណ្ដ​យ​ផ្លូវ៣៣៧ ទិសដៅ​ពី​ជើង​ទៅ​ត្បូង​ក្នុង​ល្បឿន​យ៉ាង​លឿន។ លុះ​ធ្វើដំណើរ​មកដល់​វេលា​កើតហេតុ ដែលជា​ផ្លូវបែក​ជា​បួន​ផង​នោះ ស្រាប់​តែមាន​រថយន្ត​ស៊េរី​ទំនើប​មួយគ្រឿង​ម៉ាក Mazda ពណ៌​ក្រហម ពាក់​ស្លាក​លេខ ភ្នំពេញ 2AM-1118 បើកបរ​ដោយ​នារី​រូប​ស្រស់​ជនជាតិ​ចិន​ម្នាក់ ធ្វើដំណើរ​ពី​កើ​តទៅ​លិច តាម​បណ្ដោយ៥២៨ ក្នុង​ល្បឿន​លឿនដូចគ្នា ​ដោយ​ខ្វះ​ការប្រុងប្រយ័ត្ន បាន​ទៅបុក​ចំពាក់​កណ្ដាល​រថយន្ត Range Rover លាន់​ដូច​រន្ទះ ហើយ​រថយន្ត​វិល​ទៅ​បោក​ផ្ទប់​នឹង​គល់ឈើ​ចំ​ផ្នែក​ខាងក្រោយ​ពេញទំហឹង​ទៀត បណ្តាល​ឲ្យ​រថយន្ត Range Rover រង​ការខូចខាត​ខ្ទេច​យ៉ាងដំណំ និង​ផ្ទុះ​ពោង​សុវត្ថិភាព​ក្នុង​រថយន្ត​ទាំងអស់។ ចំណែកឯ​រថយន្ត Mazda បាន​រង​ការខូចខាត​ផ្នែក​ខាងមុខ​យ៉ាងដំណំ តែ​ពិតជា​សំណាងល្អ មិន​បណ្ដាល​ឲ្យ​មនុស្ស​រងរបួស​នោះទេ ៕