ក្រោយប្រកាសលទ្ធផលប្រឡងជាថ្មីម្តងទៀតនោះ ក៏មានការប្រែប្រួលចំពោះលទ្ធផលប្រឡង ដោយកាលចេញលទ្ធផលជាដំបូង គឺមានបេក្ខជនម្នាក់ ដែលឈ្មោះថា "ប៉េង គីមហេង" ដែលទទួលបានលំដាប់ពិន្ទុខ្ពស់ជាងគេ។ ក្រោយពីមានការតវ៉ា សូមឲ្យខាងក្រសួងធ្វើការត្រួតពិនិត្យទៅលើលទ្ធផលជាថ្មីម្តងទៀត ក៏រកឃើញម្ចាស់ពិតប្រាកដ។

ការប្រកាសលទ្ធផលជាលើកទី០២នេះ បេក្ខនារីម្នាក់ដែលមកពីសាលា វិទ្យាល័យហ៊ុនសែនប៊ុនរ៉ានីផ្សារដើមថ្កូវ ដែលមានឈ្មោះថា "ថន រតនា"។ យុវតីរូបនេះ​ ពិតជារំភើបយ៉ាងខ្លាំង។ ទន្ទឹមនឹងក្តីរំភើបមួយនេះ យុវតីរូបនេះក៏បានបង្ហើបពីជីវភាព និងក្តីស្រម៉ៃដែលមិនអាចទៅរួច។ យុវតីម្នាក់នេះ បានរៀបរាប់ថា ខ្លួនជាកូនអ្នកភ្នំពេញ តែមិនមានភាពហ៊ឺហារដូចគេនោះទេ ព្រោះតែឪពុកជាអ្នករត់ម៉ូតូឌុប រីឯម្តាយជាស្ត្រីមេផ្ទះប៉ុណ្ណោះ ដោយមានបងប្អូនស្រី ៣នាក់ ហើយ ថន រតនា គឺជាកូនស្រីពៅ តែ រតនា អាចខិតខំរហូតឈានដល់ថ្ងៃនេះ។ យុវតី រតនា ក៏បានរៀបរាប់បន្តទៀតថា ដោយសារតែស្ថានភាពគ្រួសារការខ្វះខាតខ្លាំងពេក ទើបនាងសម្រេចចិត្តបោះបង់ក្តីស្រម៉ៃ ដេលមានតាំងពីដឹងក្តីមក។ តាំងពីតូចដឹងក្តីមក រតនា មានក្តីស្រម៉ៃចង់ក្លាយជាវេជ្ជបណ្ឌិតដ៏ពូកែមួយរូប តែអ្វីៗដែលមនុស្សគិតមិនដូចទេវតាគិតនោះទេ។ រតនា រៀបរាប់ទាំងក្តីអស់សង្ឃឹមថា មកពីស្ថានភាពគ្រួសារក្រីក្រ ហើយឪពុកអ្នករត់ម៉ូតូឌុប ដើម្បីយកប្រាក់បន្តិចបន្តួចមកចិញ្ចឹមគ្រួសារ ណាមួយនៅមានម្តាយ និងប្អូនៗទៀត ទើបធ្វើឲ្យនាង (រតនា) សម្រេចចិត្តបោះបង់ក្តីស្រម៉ៃដ៏ធំមួយនេះ ព្រោះប្អូនដឹងច្បាស់ថា ជីវភាពគ្រួសាររបស់ខ្លួន គឺគ្មានលទ្ធភាពក្នុងការផ្គត់ផ្គង់ ដើម្បីការសិក្សានោះទេ។ ការប្រឡងបាននិទ្ទេសល្អ ជាក្តីសង្ឃឹមចុងក្រោយរបស់ខ្លួន អាចសម្រេចជូនគ្រួសារបាន។ ជាចុងក្រោយ រតនា សង្ឃឹមថាថ្ងៃណាមួយក្តីប្រាថ្នារបស់នាងនិងបានសម្រេច ហើយក៏សង្ឃឹមថា និងមានការសណ្តោសប្រណីពីមនុស្សម្នាក់ និងជឿជាក់ថា គាត់ប្រាកដនឹងអាចជួយនាងបានទៅចុះ។