ភ្នំពេញ៖ បទបញ្ជាររបស់សម្ដេចក្រឡាហោម ស ខេង នាយរដ្ឋមន្ត្រីស្ដីទី និងជារដ្ឋមន្ត្រីក្រសួងមហាផ្ទៃ ព្រមទាំងឯកឧត្ដម ឃួង ស្រេង អភិបាលរាជធានីភ្នំពេញ ហាក់ដូចជាគ្មានប្រសិទ្ធិភាពអ្វីសោះ ខណៈមន្ត្រីក្រោមឱវ៉ាតរបស់ខ្លួនមិនយកចិត្តទុកដាក់គោរពតាមបទបញ្ជារ ថែមទាំងផ្គើនរក្សាទុកនូវទីតាំងបង្កប់ល្បែងសុីសងគ្រប់ប្រភេទមិនចុះបង្ក្រាបព្រោះខ្លាចបាត់លាភសក្ការៈចូលហោប៉ៅ និងសូមបីតែលោក ស ថេត ដែលជាស្នងការនគរបាលរាជធានីភ្នំពេញទើបតែឡើងកាន់តំណែងថ្មីកន្លងមកនេះក៏ស្ងាត់ដែរ ។

ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ បានក្រើនរំលឹកនិងដាក់បញ្ជាអោយអជ្ញាធរពាក់ព័ន្ធគ្រប់បណ្ដាខណ្ឌទាំង១២អោយយកចិត្តទុកដាក់ទប់ស្កាប់និងបង្ក្រាបអោយអស់នូល្បែងសុីសងគ្រប់ប្រភេទដែលមានក្នុងមូលដ្ឋានរបស់ខ្លួន តែផ្ទុយទៅវិញអជ្ញាធរខណ្ឌចំកាមនដែលមានលោក ព្រុំ សំខាន់ ជាអភិបាលខណ្ឌ និងលោក យុិន សាន ជាអធិការនគរបាលខណ្ឌ បែជារក្សាទុកទីតាំងបង្កប់ល្បែងសុីសងជ្រកក្រោមស្លាកយីហោ អុី ម៉ាន់នី វេលុយដែលបើកលេង២៤ម៉ោងលើ២៤ម៉ោងយ៉ាងរលូនទៅវិញ។ ទីតាំងដែលដាក់ស្លាកយីហោ អុី ម៉ាន់នី ហើយបង្កប់នូវល្បែងសុីសងទាំងនេះមាន. ទី១ តាមបណ្ដោយផ្លូវលេខ៤៣០ជិតប៉ុស្ដិ៍នគរបាលរដ្ឋបាលទំនប់ទឹក. ទី២ នៅតាមបណ្ដោយផ្លូវលេខ៤៨៨ ជិតសាលាប៊ែលធី ក្នុងសង្កាត់ផ្សារដើមថ្កូវ ទី៣ នៅតាមបណ្ដោយផ្លូវលេខ៣៦០ ជិតខារ៉ាអូខេ កូឡូស្យូល ទី៤ នៅតាមបណ្ដោយផ្លូវលេខ១៤៣ ជិតគីរីរម្យ និងទី៥ នៅតាមបណ្ដោយផ្លូវលេខ៤៣២ ក្នុងសង្កាត់បឹងត្របែក និងមានជាច្រើនកន្លែងទៀត។ ប្រជាពលរដ្ឋបានលើកឡើងថា ទីតាំងដែលបើកលេងល្បែងសុីសងខុសច្បាប់បានយ៉ាងរលូនបែបនេះ បើមិនមានការត្រូវរ៉ូវគ្នាពីអាជ្ញាធរនិងម្ចាស់ទីតាំងទេគឺមិនអាចបើកលេងបានយ៉ាងយូរដូចឆ្នេះទេ។ ប្រជាពលរដ្ឋសូមសំណូមពរដល់អជ្ញាធរពាក់ព័ន្ធគ្រប់លំដាប់ថ្នាក់ ជាពិសេសលោក ស ថេត ដែលជាស្នងការនគរបាលរាជធានីភ្នំពេញទើបតែឡើងកាន់តំណែងថ្មីៗអាចប្រើឥទ្ធិពលរបស់ខ្លួនឲ្យមន្ត្រីក្រោមថ្នាក់ចុះបង្ក្រាបទីតាំងដែលបង្កប់ល្បែងសុីសងនេះបានដែរឬទេ ៕ ដោយៈ ភារ៉ា