រតនគិរីៈ កាលពីថ្ងៃទី១៥ ខែកញ្ញា ឆ្នាំ២០១៨នេះ ស្ថិតនៅភូមិ​កាជូតលើ ឃុំ​ញ៉ាង ស្រុក​អណ្ដូងមាស ខេត្ដរតនគិរី។ មានករណីអត្តឃាតមួយ ដោយបុរសជនជាតិច្រាយម្នាក់ បានយកកាំបិតចាក់ពោះខ្លួនឯងប៉ង់បញ្ចប់ជីវិតតែមិនស្លាប់ ព្រោះតែការឈឺចិត្តនឹងនារីដែលខ្លួនស្រលាញ់បម្រុងយកធ្វើប្រពន្ធ ទៅមានកូនជាមួយប្រុសផ្សេង ហើយមកចោទប្រកាន់ថា មានកូនជាមួយខ្លួន ទាំងខ្លួនមិនបានធ្វើ​អីបន្ដិចណាសោះ​។

បើតាមសមត្ថកិច្ចមូលដ្ឋាន បានឲ្យដឹងថា បុរសរងគ្រោះឈ្មោះ ​ក្លាន ដឺយ ​អាយុ២១ឆ្នាំ ជនជាតិ​ច្រាយ សញ្ជាតិ​ខ្មែរ មុខរបរកសិករ មានទីលំនៅបច្ចុប្បន្ន ភូមិ​កាជូតលើ ឃុំ​ញ៉ាង ស្រុក​អណ្ដូងមាស ខេត្ដរតនគិរី។ ដើមចមដែលនាំឲ្យបុរសកំសត់ស្នេហ៍គិតខ្លីបែបនេះ ក៏ព្រោះតែខឹងនារីដីដែលខ្លួនស្រលាញ់បម្រុងយកធ្វើជាប្រពន្ធ ​បែរជាទៅមានកូនជាមួយប្រុសផ្សេង ហើយចោទដាក់ខ្លួនថា កូននៅក្នុងផ្ទៃ​ជាកូនរបស់ខ្លួន ហើយបងប្អូនខាងស្រី បានផាកពិន័យលុយចំនួន ១.០០០ដុល្លារ និងកូនជ្រូក ទើបគាត់សម្រេចចិត្តធ្វើអត្ដឃាតខ្លួនឯងតែម្ដង។ តែទោះជាយ៉ាងណា ក្រោយកើតហេតុភា្លមៗបុរសខាងលើ ​ត្រូវបានអ្នកភូមិចាប់ឃាត់ និងដឹកយកមកមណ្ឌលសុខភាពស្រុកអណ្ដូងមាស ដោយខាងមណ្ឌលឃើញថា សភាពធ្ងន់ធ្ងរពេក ក៏បញ្ជូនទៅមន្ទីពេទ្យបង្អែកខេត្ដរតនគិរីសង្រ្គោះបន្ទាន់៕