ស្វាយរៀងៈ កាលពីវេលាម៉ោង៥រសៀលនៅថ្ងៃទី១៦ ខែកញ្ញា ឆ្នាំ២០១៨ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។ សមត្ថកិច្ចនគរបាលក្រុងបាវិត បានធ្វើការឃាត់ខ្លួនបុរសជនសង្ស័យម្នាក់ មានឈ្មោះ ចាង ហោធាន ភេទប្រុស អាយុ២៩ឆ្នាំ ជនជាតិចិន មានទីលំនៅខណ្ឌយុងចូវ ខេត្តហូណាម ប្រទេសចិន មុខរបរបុគ្គលិកក្រុមហ៊ុនភីងអាន។ ក្រោយពីបានប្រើអំពើហិង្សាទៅលើបុរសម្នាក់ទៀតមានឈ្មោះ ហ្វួ ធីងនុង ភេទប្រុស អាយុ២៦ឆ្នាំ ជនជាតិចិន មុខរបរបុគ្គលិកកាស៊ីណូក្រោន ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង មានទីលំនៅខេត្តស៊ីឈន ប្រទេសចិន ។

ប្រភពពីជនរងគ្រោះបានឲ្យដឹងថា មុនពេលកើតហេតុកាលពីយប់ថ្ងៃទី១៥ ខែកញ្ញា ឆ្នាំ២០១៨ វេលាម៉ោងប្រហែល៧យប់ នៅចំណុចក្នុងបន្ទប់បរិវេណកាស៊ីណូម៉ុកបាយ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង មានមនុស្សសង្ស័យ៧នាក់ ដែលជាជនជាតិចិនដូចគ្នា បានមានជម្លោះពាក្យសំដីគ្នា ខណៈនោះស្រាប់តែបានប្រើអំពើហិង្សាមកលើខ្លួនដោយយកទឹកក្តៅមកស្រោចមកលើដៃធ្វើឲ្យរបួសធ្ងន់បង្កការភ្ញាក់ផ្អើលតែម្ដង។ ក្រោយកើតហេតុរួច ខ្លួនក៏បានដាក់ពាក្យបណ្តឹងទៅសមត្ថកិច្ចនគរបាលក្រុងបាវិតឃាត់ខ្លួនជនសង្ស័យម្នាក់មកសាកសួរផងដែរ។ បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួនជាបណ្តោះអាសន្ន នៅអធិការដ្ឋាននគរបាលក្រុងបាវិត ដើម្បីបំពេញសំណុំរឿងបញ្ជួនទៅការរិយាល័យជំនាញខេត្តចាត់ការបន្ត។ ចំណែក ជនសង្ស័យ០៦នាក់ទៀត សមត្ថកិ្ចច្ចកំពុងស្រាវជ្រាវ តាមចាប់យកមកផ្តន្ទាទោសតាមច្បាប់ ៕