ព្រះសីហនុ៖ ក្រសួងរៀបចំដែនដីនគរូបនីយកម្មនិងសំណង់ បានចេញសេចក្ដីប្រកាសព័ត៌មានមួយ អនុវត្តតាមបទបញ្ជាដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី ១៨ ខែកញ្ញា ឆ្នាំ២០១៨ នេះ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ អញ្ជើញចុះទៅត្រួតពិនិត្យសកម្មភាពចាក់ដីរំលោភចូលឆ្នេរសមុទ្រនៅចំណុចឆ្នេរព្រែកត្រែង ភូមិ ៤ ឃុំអូរត្រេះ ស្រុកស្ទឹកហាវ ខេត្តព្រះសីហនុ ដើម្បីឲ្យកាយយកដីដែល បានចាក់បំពេញចេញវិញ និងរក្សាឆ្នេរធម្មជាតិដូចដើម។

សកម្មភាពនៃ ការចាក់ដីរំលោភចូលទៅឆ្នេរសមុទ្រនេះ កំពុងក្លាយជាប្រធានបទដ៍ក្តៅគគុក សម្រាប់ពលរដ្ឋនៅទូទាំងប្រទេស ដែលបញ្ហានេះបានធ្វើឲ្យ ប៉ះពាល់ដល់ទឹកសមុទ្រ និងបរិស្ថាននៅជុំវិញនោះផងដែរ។ ទាក់ទងដល់បញ្ហានេះ កន្លងមក លោក ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានគណៈកម្មការគ្រប់គ្រងឆ្នេរ បានអំពាវនាវដល់អាជ្ញាធរខេត្តព្រះសីហនុ មានចំណាត់ការឲ្យបានតឹងរ៉ឹងក្នុងការថែរក្សាឆ្នេរសមុទ្រកុំឲ្យមានការសាងសង់រំលោភ និងទន្ទ្រានផ្សេងៗ។ ចំណែកលោក យន្ត មីន អភិបាលខេត្តព្រះសីហនុ បានថ្លែងថា៖ «ក្រុមហ៊ុនបានសុំច្បាប់រួចហើយគឺពួកគាត់មិនមានកំហុសអ្វីធ្ងន់ធ្ងរទេ ក្រុមហ៊ុនគ្រាន់តែខ្វះចន្លោះបច្ចេកទេសបន្ដិចបន្ដួចមានន័យថាតាមបច្ចេកទេសគេត្រូវដាក់ថ្មមុន ដាក់ថ្មហើយ បានចាក់ដីទៅ ទើបបានវាអត់អី ប៉ុន្ដែគាត់ចាក់ដី និងថ្មលាយគ្នា អ៊ីចឹងពេលភ្លៀងមកវារលាយដីចូលសមុទ្រអស់»។ លោកយន្ត មីន បញ្ជាក់ថា៖ «ចំណែកករណីទឹកសមុទ្រប្ដូរពណ៌ល្អក់នេះគឺក្រុមហ៊ុនបានសម្រុកចាក់ដីទាំងភ្លៀង គាត់ចាក់ដីទាំងភ្លៀង ពេលចាក់ទៅវាហូរដីហ្នឹងទៅតាមទឹក ចូលសមុទ្រ អ៊ីចឹងចាក់កន្លែងណា វាហូរកន្លែងហ្នឹង ហើយក៏ធ្វើឲ្យសមុទ្រប្រែពណ៌អ៊ីចឹងទៅតែឥឡូវនេះវាប្រែពណ៌មកធម្មតាវិញហើយ»។ ក្រុមហ៊ុនដែលបានចាក់ដីលុបឆ្នេរព្រែកត្រែងនោះ មិនមែនជាក្រុមហ៊ុនរបស់ចិននោះទេ គឺក្រុមហ៊ុនអភិវឌ្ឍន៍របស់ខ្មែរ គឺរបស់លោកស្រី ជឹង សុភាព ហៅយាយភូ៕