ផ្ទុះបាតុកម្ម.. រឿងដកលោកនាយក ស៊ុយហេង នាយកវិទ្យាល័យព្រះស៊ីសុវត្ថិ - សង្គម សិល្បៈ កម្សាន្ដ - Khmer News - The latest Cambodia News. Khmer Times is the region's fastest growing newspaper with daily insights into Cambodia and ASEAN

ផ្ទុះបាតុកម្ម.. រឿងដកលោកនាយក ស៊ុយហេង នាយកវិទ្យាល័យព្រះស៊ីសុវត្ថិ

ភ្នំពេញ ៖ លោកគ្រូ អ្នកគ្រូ និងសិស្ស នៃវិទ្យាល័យព្រះស៊ីសុវត្ថិ បាននាំគ្នាផ្តិតមេដៃតវ៉ាប្រឆាំងដាច់ខាតនូវការដកលោកនាយកគ្រប់គ្រងសាលាវិទ្យាល័យព្រះស៊ីសុវត្ថិ និងការដាក់បញ្ចូលវិទ្យាល័យព្រះស៊ីសុវត្ថិទៅជាសាលាជំនាន់ថ្មី ដែលហៅកាត់ NGS គឺប្រៀបដូចទៅនឹងសាលាឯកជនមួយ កើតឡើងលើវិទ្យាល័យមួយនេះ។

ការតវ៉ានេះហាក់បីដូចជាប្រឆាំងនឹងថ្នាក់លើរបស់ខ្លួន គឺលោករដ្ឋមន្ត្រីក្រសួងអប់រំ ខណៈដែលមន្ទីរអប់រំ យុវជន និងកីឡា រាជធានីភ្នំពេញ បានចេញសេចក្តីជូនដំណឹង ដោយប្រកាសអញ្ជើញគណៈនាយក លោកគ្រូ អ្នកគ្រូ ទាំងអស់នៃវិទ្យាល័យព្រះស៊ីសុវត្ថិ ចូលមប្រជុំស្តីពី ការប្រកាសសមាសភាពគណៈគ្រប់គ្រង បណ្តោះអាសន្ននៅវិទ្យាល័យ ព្រះស៊ីសុវត្ថិ នាថ្ងៃទី១៩ខែកញ្ញា ក្រោមអធិបតីភាពលោក បណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡា។

បណ្តាញសង្គមហ្វេសប៊ុក គណនី Phosthey Kouy បានលើកឡើងថា យើងមិនចង់បាត់បង់វិទ្យាល័យព្រះស៊ីសុវត្ថិរបស់យើង។ ម្ចាស់គណនីហ្វេសប៊ុកខាងលើក៏បានបន្ថែមទៀតថា "សូមកុំអូសរំលងឱ្យសោះ និងសុំជួយ share ម្នាក់មួយមក! ព្រោះយើងមិនចង់បាត់បង់វិទ្យាល័យព្រះស៊ីសុវត្ថិរបស់យើង។ សុខៗ មកឮថាចង់ផ្លាស់ប្តូរដាក់ជាNGS (សាលាជំនាន់ថ្មី) គិតថាNGS និងល្អប៉ុនណាទៅ អស្ចារ្យ ប៉ុនណាទៅ បានជាចង់មកលុបបំបាត់វិទ្យាល័យរបស់ពួកយើង។ សុំលោករដ្ឋមន្ត្រីក្រសួងអប់រំ ដកសាលារៀនជំនាន់ថ្មីចេញទៅ។ លើសពីនេះទៅទៀត សូមលោកពិចារណាឡើងវិញនូវការដែលលោកចង់ដកលោកនាយក មូល ស៊ុយហេងចេញ។ ពួកយើងមិនឯកភាពដាច់ខាត។ ឱ! វិទ្យាល័យខ្ញុំអើយ តើអ្នកនឹងក្លាយទៅជាយ៉ាងណា? ???"។

យ៉ាងណាមិញ ក៏មានម្ចាស់គណនីហ្វេសប៊ុកមួយដែលមានឈ្មោះថា "Sam Kamsann" ក៏បានបញ្ជាក់ថា "សូមអ្នកសរសេរ ឬធ្វើការប្រឆាំងនឹងការបញ្ចូលកម្មវិធីសាលាជំនាន់ថ្មីក្នុងសាលាព្រះស៊ីសុវត្ថិិ ថាជាការដោះដូរឈ្មោះសាលាជំនាន់ដើម មេត្តាអាននូវអត្ថបទខាងក្រោមយល់ហើយ កុំចេះតែ«តែតែ ស្កស្ក» អី! តើអ្វីទៅជាសាលាជំនាន់ថ្មី (NGS)? សាលារៀនជំនាន់ថ្មីគឺជាកម្មវិធីកំណែទម្រង់ប្រព័ន្ធអប់រំរបស់រាជរដ្ឋាភិបាលកម្ពុជាដែលជាមាគ៌ាអភិវឌ្ឍន៍ថ្មីមួយនៅក្នុងប្រព័ន្ធអប់រំនាពេលបច្ចុប្បន្នដែលជួយបង្កើតសាលារៀនសាធារណៈស្វយ័ត។ គំនិតសម្រាប់ការធ្វើកំណែទម្រង់ប្រព័ន្ធអប់រំត្រូវផ្តួចផ្តើមឡើងដំបូងដោយអង្គការ KAPE ដែលជាអង្គការក្នុងស្រុកធំបំផុតដែលផ្តោតសំខាន់ទៅលើវិស័យអប់រំនៅកម្ពុជា ហើយក្រោយអង្គការនេះត្រូវបានអនុម័ត និងត្រូវបានឧបត្ថម្ភថវិកាដោយក្រសួងអប់រំ យុវជន និងកីឡា។ កម្មវិធីសាកល្បងរបស់ពួកគេដែលជាគំនិតផ្តួចផ្តើមសាលា Beacon ត្រូវបានស្ថាបនាឡើងនៅឆ្នាំ ២០១៤ នៅខេត្តកំពង់ចាមហើយនៅពេលដែលកម្មវិធីមានការពង្រីកធំទៅៗ សាលានេះក៏ក្លាយជាសាលាជំនាន់ថ្មីនេះឯង។ គោលបំណងរបស់ NGS គឺការបង្កើតសាលារដ្ឋដែលរក្សាបាននូវស្តង់ដារនៃការអប់រំបានខ្ពង់ខ្ពស់បំផុតតាមរយៈការវិនិយោគថវិកាច្រើន។ NGS ផ្តោតទៅលើការពង្រឹងតម្លាភាព និងទទួលខុសត្រូវដោយការផ្លាស់ប្តូរវិធីគ្រប់គ្រងសាលា។ នេះគឺជាការខុសប្លែកពីវិធីសាស្ត្រប្រពៃណីរបស់រដ្ឋាភិបាលដែលរមែងតែងតែបែងចែកមូលនិធិស្មើៗគ្នាទាំងអស់។ ប្រសិនបើមិនមានការទទួលខុសត្រូវក្នុងការគ្រប់គ្រងសាលារៀនទេនោះ សម្ភារបរិក្ខារដូចជាបន្ទប់ពិសោធវិទ្យាសាស្ដ្រនឹងមិនត្រូវបានប្រើប្រាស់ឲ្យអស់ពីសមត្ថភាពទេពីព្រោះគ្រូបង្រៀនរវល់តែស្វិតស្វាញក្នុងការបង្រៀនគួរយកលុយក្រៅម៉ោងវិញ និងមានភាពលម្អៀងទៅលើសិស្សរៀនគួរជាងសិស្សដែលមិនមានលុយរៀនគួរ។ សាលាជំនាន់ថ្មីព្យាយាមដោះស្រាយបញ្ហានេះដោយការលុបបំបាត់ការអនុវត្តបែបនេះទាំងស្រុង។ គ្រូបង្រៀនត្រូវបានជ្រើសរើសយ៉ាងល្អិតល្អន់ និងទទួលបានអត្ថប្រយោជន៍ជាច្រើនដូចជាការផ្តល់អាហារូបករណ៍ដើម្បីពង្រឹងគុណធម៌ក្នុងការបង្រៀន និងសុចរិតភាព។ គេបានសង្កេតឃើញថានៅក្នុងបរិយាកាសថ្មីនេះគ្រូបង្រៀនលែងមានការប្រកួតប្រជែងជាមួយគ្នាដើម្បីទាក់ទាញអតិថិជនដែលជាសិស្សនោះទេ ហើយវាធ្វើឲ្យការពង្រឹងគុណភាពនេះប្រព្រឹត្តទៅដោយរលូន។ វាមានន័យចឹង មិនមែនគេមានបំណងលុបចោលសាលាព្រះស៊ីសុវត្ថិទេ។ មានន័យថា សាលាព្រះស៊ីសុវត្ថិ នៅតែជាសាលាព្រះស៊ីសុវត្ថិ ប៉ុន្តែគេគ្រាន់តែបញ្ចូលកម្មវិធីសិក្សាគឺមានការកែទម្រង់តាម NGS"៕