​ភ្នំពេញ ៖ កាលពី​វេលា​ម៉ោង​៧​និង​៣០​នាទី​យប់ ថ្ងៃ​ទី​១៨ ខែកញ្ញា ឆ្នាំ​២០១៨ ស្ថិត​នៅ​ចំណុច​ផ្លូវ​វេ​ង​ស្រេង ភូមិ​ចោម​ចៅ​ទី​៣ សង្កាត់​ចោម​ចៅ​ទី​២ ខណ្ឌ​ពោធិ៍​សែន​ជ័យ នារី២នាក់ បងប្អូនបង្កើត​ចេញពី​រៀន​ភាសា​ចិន​ជិះ​ម៉ូតូ​ទៅ​ផ្ទះ​វិញ​ ក៏បានជួបជនសង្ស័យ២នាក់ ធ្វើសកម្មភាពឆក់កាបូបស្ពាយ តែមិនបានសម្រេច ក៏ត្រូវបានប្រជាពលរដ្ឋនិង​នគរបាល​ប៉ុស្តិ៍​ចោម​ចៅ​ទី​២​ឃាត់ខ្លួន​បាន​ម្នាក់​រ និងម្នាក់ទៀតរត់គេចខ្លួនបាត់។

ជនសង្ស័យដែលសមត្ថកិច្ចធ្វើការឃាត់ខ្លួន ជនសង្ស័យទី១.ឈ្មោះ ចិត្ត សុ​វ​ណ្ណា​រ៉ា ភេទ​ប្រុស អាយុ​២៨​ឆ្នាំ មុខរបរ​មិន​ពិតប្រាកដ ទើប​ចេញពី​មណ្ឌល​កែប្រែ​ឱកាស​ខ្ញុំ​បាន​២​ថ្ងៃ និង ជនសង្ស័យទី២. ឈ្មោះ ជាតិ ភេទ​ប្រុស អាយុ​២៥​ឆ្នាំ មុខរបរ​មិន​ពិត សព្វថ្ងៃ​ស្នាក់​នៅផ្ទះ​ជួល ភូមិ​ត្រពាំង​ថ្លឹង​១ សង្កាត់​ចោម​ចៅ​ទី​១ ខណ្ឌ​ពោធិ៍​សែន​ជ័យ រត់គេច​ខ្លួន ។ ជន​រង​គ្រោះ​បាន​ឲ្យ​ដឹង​ថា មុន​ពេល​កើតហេតុ​រូប​ខ្លួន និង​ប្អូនស្រី​ជិះ​ម៉ូតូ​មួយ​គ្រឿង​ម៉ាក Zoomer-X ខ្មៅ​ទឹកក្រូច បាន​ចេញពី​រៀន​ភាសា​ចិន​នៅ​ម្តុំ​កា​ណា​ឌី​យ៉ា​ បំណង​ត្រឡប់​ទៅ​ផ្ទះ លុះ​មក​ដល់​ចំណុច​កើតហេតុ​ក៏​ស្រាប់តែ​ជួបនឹង​ជនសង្ស័យ​ចំនួន​២​នាក់​ជិះ​ម៉ូតូ​ម៉ាក​យ៉ា​ម៉ា​ហា​ហ្វី​ណូ ពណ៌​ក្រហម ជិះ​មក​ក្បែរ​ម៉ូតូ​ខ្លួន​ហើយ​​ជនសង្ស័យ​ម្នាក់​បាន​ឆក់​កាបូប​របស់​ខ្លួន​តែ​មិន​បាន​សម្រេច​បណ្តាល​ឲ្យ​ដួល​ទាំងអស់​គ្នា ហើយ​ជនសង្ស័យ​បាន​ព្យាយាម​រត់​តែ​ត្រូវ​ប្រជាពលរដ្ឋ​រួម​នឹង​កងកម្លាំង​ល្បាត​របស់​ប៉ុស្តិ៍​នគរ​បាល​ចោម​ចៅ​ទី​២​ឃាត់ខ្លួន​បាន​ម្នាក់ ​រត់​រួចខ្លួន​ម្នាក់ ។ ក្រោយ​កើតហេតុ​ជនសង្ស័យ​ត្រូវ​បាន​នគរបាល​ប៉ុស្តិ៍​ចោម​ចៅ​ទី​២​ឃាត់ខ្លួន​សួរនាំ និងប​ញ្ចូ​ន​​បន្ត​ទៅ​កាន់​ផ្នែក​ជំនាញ​ដើម្បី​អនុវត្ត​បន្ត​តាម​នីតិវិធី ដោយឡែក​កាបូប និង​លុយ​ត្រូវ​បាន​ប្រគល់​ជូន​ជន​រង​គ្រោះ​វិញ ៕ ដោយៈ ភារ៉ា