ដុតបាត់!!! អ្នកស្រី ខៀវ សារ៉ុន តំណាងប្រជាសហគមន៍ មុនបើកវគ្គបណ្តុះបណ្តាលពីវិធីចិញ្ចឹមមាន់ អ្នកភូមិបានទៅសុំការអនុញ្ញាតពីលោក អភិបាលស្រុក និងការិយាល័យកសិកម្មស្រុករួចហើយ តែបែរជាលោក សំអុល អធិការស្រុក ឆ្លើយថាគ្មានច្បាប់អនុញ្ញាត...

ស្វាយរៀងៈ នៅថ្ងៃចន្ទទី១៧ ខែកញ្ញា ឆ្នាំ២០១៨នេះ កម្លាំងសមត្ថកិច្ចនគរបាលប៉ុស្តិ៍ ក្រោមការត្រួតពិនិត្យ និងបញ្ជាពីអធិការស្រុករមាសហែកគឺលោក សំអុល បានចុះហាមឃាត់ប្រជាសហគមន៍ដែលកំពុងតែទទួលវគ្គបណ្តុះ បណ្តាលពីវិធីចិញ្ចឹមមាន់ តាមបែបធម្មជាតិនិងការផ្សំចំណីមាន់តាមបែបធម្មជាតិ របស់ប្រជាសហគមន៍នៅភូមិត្រពាំងពពេល ឃុំអំពិល ស្រុករមាសហែក ខេត្តស្វាយរៀង។

ចំពោះករណីការចុះឃាត់ប្រជាសហគមន៍បានបង្កឲ្យភ្ញាក់ផ្អើលនិងមានការងឿងឆ្ងល់យ៉ាងខ្លាំងពីសំណាក់ប្រជាពលរដ្ឋ ខណៈដែលតំណាងប្រជាសហគមន៍ហៅទង្វើនេះថា ជាការគំរាមកំហែង និងរារាំងការអភិវឌ្ឍកម្រិតជីវភាពរបស់ប្រជាពលរដ្ឋ បង្អាក់ការចង់ចេះចង់ដឹងរបស់អ្នកភូមិ។ អ្នកស្រី ខៀវ សារ៉ុន តំណាងប្រជាសហគមន៍ក្នុងភូមិពពេល បានថ្លែងប្រាប់ឲ្យដឹងថា មុនបើកវគ្គបណ្តុះបណ្តាលពីវិធីចិញ្ចឹមមាន់នេះ អ្នកភូមិបានទៅសុំការអនុញ្ញាតពីលោក អភិបាលស្រុក និងការិយាល័យកសិកម្មស្រុករួចហើយដែរ ហើយក៏ទទួលបានការយល់ព្រមឯកភាពផងដែរ ប៉ុន្តែដល់ពេលបង្រៀន បែរជាសមត្ថកិច្ចចុះមកបិទវគ្គ បណ្តុះបណ្តាលវិញដោយនគរបាលប្រាប់ថា មកពីអ្នកភូមិមិនសុំច្បាប់ជួបជុំគ្នាពីសាលាខេត្ត។

ផ្ទុយពីការលើកឡើងពីតំណាងប្រជាសហគមន៍ លោក សំអុល អធិការស្រុក រមាសហែកបានប្រាប់ឲ្យដឹងនៅរសៀលថ្ងៃចន្ទ ទី១៧ ខែកញ្ញា ឆ្នាំ២០១៨ នេះថា ការធ្វើសកម្មភាពបង្រៀនពីវិធី ចិញ្ចឹមមាន់របស់សហគមន៍សាមគ្គីរមាសហែកនោះ គឺពួកគាត់មិនបានសុំច្បាប់ទេហើយក៏គ្មានច្បាប់មកដែរ ដោយនាំគ្នារៀនគ្មានការសុំច្បាប់ឡើយ ទើបមានកម្លាំងទៅហាមឃាត់នូវសកម្មភាពទាំងនេះ ។

ករណីហាមឃាត់នេះដែរ លោកស៊ឹង សែនករុណា មន្ត្រីជាន់ខ្ពស់នៃសមាគម អាដហុកបានប្រាប់នៅរសៀលរសៀលថៃ្ងម្សិលមិញឲ្យដឹងថា «ក្នុងករណីបើយើងពិនិត្យមើលទៅរដ្ឋធម្មនុញ នៃព្រះរាជាណាចក្រកម្ពុជាយើងដូចជាសេចក្តីប្រកាសជាសកល កតិកាសញ្ញា ស្តីពីសិទ្ធិពលរដ្ឋនិងនយោបាយទៅលើ កតិកាសញ្ញាទាំងអស់នេះ ហើយទង្វើដែល អាជ្ញាធរចុះទៅឃាត់នោះ គឺជាទង្វើបំពានទៅលើការបិទសិទ្ធិសេរីភាព នៅក្នុងមូលដ្ឋានរបស់ប្រជាពលរដ្ឋ ក្នុងនោះមាន៣រួមមាន សិទ្ធិក្នុងការជួបប្រជុំសិទ្ធិខាងសមាគម និងសិទ្ធិសេរីភាពក្នុងការបញ្ចេញមតិ » ៕