ភ្នំពេញ ៖ យោង​តាម​ប្រភព​ពី​អ្នក​ទៅ​សុំ​កែ​ឈ្មោះ ឬ ត្រកូល នៅ​លើ​អត្តសញ្ញាណប័ណ្ណ បាន​ឲ្យ​ដឹង​ថា ការ​សុំ​កែ​ត្រកូល ត្រូវ​មន្ត្រី​ឲ្យ​ខាង​នាយកដ្ឋាន​អត្រានុកូលដ្ឋាន នៃ​អគ្គនាយកដ្ឋាន​អត្តសញ្ញាណ​កម្ម ទារ​ឲ្យ​បង់លុយ​ចំនួន​៦០០​ដុល្លារ​សហរដ្ឋអាមេរិក ទើប​គេ​ធ្វើ​អោយ ។

ប្រភព​បាន​ស្រង់​សម្ដី​មន្ត្រី​នាយកដ្ឋាន​អត្រានុកូលដ្ឋាន ដោយ​បញ្ជាក់​បន្ថែម​ថា ប្រការ​ដែល​ខាង​មន្ត្រី​ជំនាញ​ខាង​រត់ការ​កែ​ឈ្មោះ ឬ ត្រកូល នៅ​លើ​អត្តសញ្ញាណប័ណ្ណ ទារ​លុយ​ច្រើន​បែប​នេះ ដោយ​ពួក​គេ (​មន្ត្រី​) លើក​ឡើង​ថា ត្រូវ​រត់ការ​រហូត​ចេញ​សាលក្រម​ពី​តុលាការ​ទៀត ទើបបាន ។ នៅ​ព្រឹក​ថ្ងៃ​ទី​៣០ ខែសីហា ឆ្នាំ​២០១៨​នេះ អ្នក​យក​ព័ត៌មាន​របស់ «KBN» មិន​អាច​រក​ការ​សុំ​អត្ថាធិប្បាយ​បាន​ទេ ពី​លោកនាយ​ឧត្តមសេនីយ៍​សន្តិ​បណ្ឌិត ម៉ៅ ច័ន្ទ​តារា អគ្គនាយក​នៃ​អគ្គនាយកដ្ឋាន​អត្តសញ្ញាណ​កម្ម នៃ​ក្រសួងមហាផ្ទៃ ក៍​ដូច​ជា​អ្នកនាំពាក្យ​អគ្គនាយកដ្ឋាន​អត្តសញ្ញាណ​កម្ម ។ ប្រជាពលរដ្ឋ​ដែល​ទៅ​សុំ​ដូរ​ឈ្មោះ​ត្រកូល នៅ​លើ​អត្តសញ្ញាណប័ណ្ណ បាន​អំពាវនាវ​ដល់​សម្តេច​ក្រឡាហោម ស ខេ​ង ឧ​បក​នាយក​រដ្ឋមន្ត្រី រដ្ឋមន្ត្រី​ក្រសួងមហាផ្ទៃ មេត្តា​ជួយ​ពិនិត្យ​ការ​យក​លុយ​ហួសហេតុ​ខាងលើ ក៍​ដូច​ជា​ជួយ​សម្រួល​បញ្ហា​នេះ ព្រោះ​ពួក​គាត់​ជា​អ្នក​ក្រីក្រ ពុំ​មាន​ល​ទ្ឋ​ភាព​បង់លុយ​រហូត​ដល់​៦០០​ដុល្លារ​នោះ​ទេ ៕ ប្រភព៖ kbn.news