ភ្នំពេញៈ កាលពីម៉ោងជាង៦ព្រឹក ថ្ងៃទី២១ ខែកញ្ញា ឆ្នាំ២០១៨ ស្ថិតនៅវាលស្រែ ខាងជើងភូមិព្រៃស្ពឺ សង្កាត់ចោមចៅ២ ខណ្ឌពោធិសែនជ័យ។ ស្ត្រីម្នាក់ មានឈ្មោះ អេន ពៅ អាយុ ២១ឆ្នាំ មុខរបរ កម្មការនីរោងចក្រ ស្នាក់នៅផ្ទះជួល រួមជាមួយប្តី ជាមេការហាង នៅក្នុងភូមិចោមចៅ២ សង្កាត់ចោមចៅ២ ខណ្ឌពោធិសែនជ័យ។ មានស្រុកកំណើត ភូមិគុស ឃុំគុស ស្រុកត្រាំកក់ ខេត្តតាកែវ។ បាន ចាញ់បោកក្រុមទម្លាក់យោង ដែលប្រើល្បិចធ្វើជាជ្រុះកញ្ចប់មាស ហើយនាំទៅដោះបូតយកគ្រឿងអលង្កាអស់ពីខ្លួនរលីង។
តាមការរៀបរាប់ពីស្ត្រីរងគ្រោះ បានឲ្យដឹងថា ដំបូងនាងដើរចេញពីបន្ទប់ជួល ឆ្ពោះទៅធ្វើការរោងចក្រ ក្បែរនោះ ត្រូវបាន ស្ត្រីសង្ស័យម្នាក់ ដើរមកសួរ ថាមានរើសបានកញ្ចប់ថង់មាសអត់ ព្រោះគេជ្រុះបាត់ នាងមិនទាន់តែឆ្លើងផង ស្រាប់តែមានស្ត្រីម្នាក់ និងបុរសម្នាក់ជិះម៉ូតូស្មាស់ មួយគ្រឿងមិនចាំស្លាកលេខ ឌុបគ្នាមកដល់ ប្រាប់ថាកុំមាត់ គេរើសបាន ទុកឲ្យទៅដូរចែកគ្នា ហើយបញ្ចុះបញ្ចូល ឌុបនាង រួមដំណើរជាមួយបុរសពីរនាក់ទៀត។
សរុបជនសង្ស័យ៥នាក់ (ប្រុស៣នាក់ ស្រី២នាក់) ឌុបនាងចេញពីខាងក្រោយផ្សារកាណាស៊ីធី កាត់តាមផ្លូវភូមិព្រៃល្វា ឆ្ពោះទៅវាលស្រែ ខាងជើងភូមិ ព្រៃស្ពឺ សង្កាត់ចោមចៅ២ ទើបឈប់។ បន្ទាប់ស្ត្រីសង្ស័យ លាត បង្ហាញកញ្ចប់ ថង់ ឲ្យមើល ឃើញលោហៈក្រហមច្រាល ហុចឲ្យកាន់ រួចចាប់ទាញដៃ ច្បូតយកកង់ដៃអស់១៨កង ដោះយកខ្សែក ឆក់យកទូរស័ព្ទ និងលុយ ហើយឡើងជិះម៉ូតូ គេចចេញភ្លាម មើលក្នុងថង់ ឃើញដឹងថាគ្រឿងកាឡៃក៏ បោះគ្រវាត់ចោលទៅក្នុងទឹកស្រែ ទ្រហោយំ ដើរទៅក្នុងភូមិ ប្រាប់អ្នកភូមិឲ្យជួយ។ នាងត្រូវបានបងប្អូនប្រជាពលរដ្ឋនាំទៅចុះរារកកញ្ចប់ថងមាស មកទុកគ្រាន់កាន់យកទៅប្តឹងប៉ូលីស ។
ក្រោយកើតហេតុ ស្ត្រីរងគ្រោះត្រូវបានប្រជាពលរដ្ឋ ជួយឌុបជូនទៅប្តឹងនគរបាលប៉ុស្តិ៍ចោមចៅ២ ដើម្បីឲ្យសមត្ថកិច្ចជួស្រាវជ្រាវ ៕