ជិតដល់វដូវបុណ្យភ្ជុំហើយ!!! អាជ្ញាធរប្រកាសឲ្យប្រយ័ត្ន ព្រោះឈ្មួញសម្រុកនាំចូលទំនិញខូចគុណភាពជាច្រើន ពីប្រទេសថៃ តាមច្រកបាត់ដំបង

បាត់ដំបងៈ កាលពីថ្ងៃទីថ្ងៃទី២២ ខែកញ្ញា ឆ្នាំ២០១៨ លោក ហាក់ សុខរិន ប្រធានសាខាកុងត្រូលខេត្តបាត់ដំបង បានដឹកនាំកម្លាំងមន្ត្រី សហការជាមួយមន្ត្រីមន្ទៅរពាណិជ្ជកម្មខេត្ត និងសមត្ថកិច្ចពាក់ព័ន្ធជាច្រើន បានចុះត្រួតពិនិត្យទំនិញជាច្រើន ដែលនាំចូលពីប្រទេសថៃ ក្នុងនោះបានដកហូតណែមសាច់ជ្រូកខូចគុណភាព៣៤០គីឡូក្រាម និងទឹកផ្លែឈើគ្មានកាលបរិច្ឆេទប្រើប្រាស់ចំនួន៣៣៦គីឡូក្រាម យកទៅដុតកម្ទេចចោល ដើម្បីជាការព្រមានដល់ក្រុមអាជីវកររកស៊ីនាំចូលទំនិញ និងគ្រឿងឧបភោគ បរិភោគខូចគុណភាព និងហួសកាលបរិច្ឆេទនាំចូលពីប្រទេសថៃ យកមកលក់ឲ្យប្រជាពលរដ្ឋកម្ពុជាប្រើប្រាស់នាំឲ្យខូចសុខភាព។

ក្នុងប្រតិបត្តិការនេះ ត្រូវបានប្រជាពលរដ្ឋធ្វើការគាំទ្រយ៉ាងខ្លាំង ចំពោះការទប់ស្កាត់ការនាំចូលទំនិញខូចគុណភាព គ្មានកាលបរិច្ឆេទត្រឹមត្រូវ ឬទំនិញមានសារជាតិគីមី ដែលបង្កផលប៉ះពាល់ដល់សុខភាពរបស់ប្រជាពលរដ្ឋខ្មែរ ពិសេសគឺក្នុងឱកាសមុនបុណ្យភ្ជុំបិណ្ឌនេះតែម្ដង។ លោកប្រធានសាខាបានបញ្ជាក់ថា ការចុះត្រួតទំនិញនិងគ្រឿងឧបភោគ បរិភោគនេះ គឺមិនមែនធ្វើតែនៅក្នុងប្រទេសនោះទេ ទោះបីនៅតាមច្រកព្រំដែន និងនៅតាមទីផ្សារនានាទាំងអស់ ក៏ត្រូវបង្កើនការទប់ស្កាត់ដែរ។

កម្លាំងជំនាញកាំកុងត្រូល និងមន្ត្រីពាក់ព័ន្ធ បានអំពាវនាវដល់ប្រជាពលរដ្ឋ ជាពិសេសស្ត្រីអ្នកដើរផ្សារសូមប្រុងប្រយ័ត្នមុននឹងទិញទំនិញ ចំណីអាហារប្រចាំថ្ងៃ សូមពិនិត្យឱ្យបានច្បាស់លាស់ជាមុនសិន ជៀសវាងទិញប៉ះលើទំនិញខូចគុណភាព បង្កប៉ះពាល់ដល់សុខភាពដល់ទីញយកទៅប្រើប្រាស់៕