សួរថាអ្នកណាមិនភ័យ!!! យកមងទៅរាយពីល្ងាច សង្ឃឹមថាព្រលឹមឡើងនិងបានត្រី តែមិនបានត្រីអី មកជាប់ក្រពើមួយក្បាល ទំងន់ជិត២០០គ.ក រត់ឡើងព្រលឹងចុងសក់

ពោធិ៍សាត់ៈ កាលពីព្រឹកថ្ងៃទី២៥ ខែកញ្ញា ឆ្នាំ២០១៨ ត្រង់ចំណុចក្នុងស្ទឹងមេទឹក (ដែនជម្រកសត្វព្រៃភ្នំសំកុស) ស្ថិតក្នុងភូមិកណ្តាល ឃុំថ្មដា ស្រុកវាលវែង ខេត្តពោធិ៍សាត់។ បុរសម្នាក់ មានឈ្មោះ មឿន មីន ភេទប្រុស រស់នៅភូមិ.ឃុំខាហងលើ។ ឡើងភ័យបះសក់ ខណៈទៅរាយមងយកត្រី មិនបានត្រីបែរជាជាប់ សត្វក្រពើ១ក្បាលខ្មៅគ្រាក់ ទម្ងន់ជិត២០០គីឡូក្រាម។

បុរសខាងលើបានរៀបរាប់ឲ្យដឹងថាៈ កាលពីល្ងាចរូបគាត់បានទៅរាយមងក្នុងទឹកស្ទឹងនៅចំណុចខាងលើ រួចក៏ទៅសម្រាកនៅផ្ទះវិញ លុះព្រឹកឡើងរូបគាត់ទៅមើលមង ក៏ប្រទះឃើញជាប់សត្វអ្វីមួយធំណាស់ ហើយបាននឹងកំពុងរើបម្រាស់ ដោយមងរុំខ្លួន វាជិត គាត់ក៏ទាញឡើងឃើញជាប់សត្វក្រពើដ៏ធំ១ក្បាលទម្ងន់ប្រមាណជាងជិត២០០គីឡូក្រាម ខណៈនោះគាត់បានរាយការណ៍ ប្រាប់សមត្ថកិច្ច ឲ្យមកជួយអន្តរាគមន៍លើកក្រពើ១ក្បាលនេះ។

បច្ចុប្បន្នសត្វក្រពើនេះត្រូវបានដឹកយកមករក្សាទុក នៅទីបញ្ជាការដ្ឋានវរៈការពារព្រំដែនគោកលេខ៨២៥ រង់ចាំបញ្ជាពីថ្នាក់លើ ហើយអាចនឹងលែងចូលក្នុងទឹកស្ទឹងខាងលើនោះវិញ ព្រោះតំបន់នោះជាដែនការពារ និងអភិរក្សសត្វចំរុះផងនោះ ៕