ប្អូនបង្កើតសម្តេចហ៊ុន សែន បង្ហើបប្រាប់អ្នកលេងហ្វេសប៊ុកថា ជួយមើលមុខវាំងផង ខ្លាចមានឧកញ៉ាលុបទន្លេ យកដីទៀត ទុក្ខសម្រាប់បុណ្យអ៊ុំទូក ពីព្រោះជិតដល់ខែអ៊ុំទូកហើយ

កាលពីប៉ុន្មានថ្ងៃមកនេះ នៅក្នុងបណ្តាញសង្គមហ្វេសប៊ុក បានធ្វើការចែករំលែក និងខមិនតៗគ្នា អំពីបញ្ហាការចាក់ដីរំលោភយកព្រែកទន្លេបឹងបួ ជាពិសេសចាក់លុបឆ្នេរសមុទ្រធម្មជាតិនៅខេត្តព្រះសីហនុពីសំណាក់អ្នកមានអំណាច និងឧកញ៉ាៗជាដើម។

ជាមួយគ្នានោះអ្នកលេងបណ្តាញសង្គមជាច្រើននាក់ដែលតែងតែធ្វើការរិះគន់ឥតសំចៃមាត់ទៅលើមន្ត្រី និងឧកញ៉ាខិលខូចមួយចំនួន ដែលឃុបឃិតគ្នាលេបដីមិនចេះឆ្អែត។

ជាក់ស្តែងកាលពីថ្ងៃទី២៥ ខែកញ្ញា ឆ្នាំ២០១៨ លោកស្រីហ៊ុន ស៊ីណាត លោកស្រីបានសរសេរបង្ហោះនៅលើហ្វេកប៊ុកផ្លូវការរបស់លោកស្រី ថា" ផែនដីមូលមែនបានជួបញាតិច្រើនណាស់ថ្ងៃនេះរួមដំណើរជាមួយគ្នាទៅអាមេរិក?សូមជម្រាបលាមិត្តរួមFacebook មួយរយៈសិនហើយ។ សូមផ្ដាំមិត្តរួម Facebook ជួយមើលមុខវាំងផងខ្លាចមានឧកញ៉ាលុបទន្លេយកដីទៀតទុក្ខសម្រាប់បុណ្យអ៊ុំទូកពីព្រោះជិតដល់ខែអ៊ុំទូកហើយ"។

លោកស្រី ហ៊ុន ស៊ីណាត សរសេរបង្ហោះបែបនេះ ក្នុងបំណងឌឺដង ស៊កសៀត ចំអកឲ្យលោក ឧកញ៉ាៗ និងអ្នកមានអំណាចទាំងឡាយ ដែលតែងតែរំលោភយកដីប្រជារាស្ត្រស្លូតត្រង់ និងដីទន្លេបឹងបួ ឬឆ្នេរសមុទ្រដែលជាដីសាធារណៈរបស់រដ្ឋដោយឥតអៀនខ្មាស់។