សៀមរាប៖ គេបានរកឃើញក្រុមហ៊ុនចំនួន៣ កាន់តែថ្លើមធំទៅហើយ ហ៊ានទៅបំពានអាងទឹករបស់រដ្ឋ ដោយវិធីចាក់លុបដី និងកសាងសំណង់ដោយខុសច្បាប់ ទៅលើអាងទឹកត្រាវកុដិ ដែលជារមណីយដ្ឋានថ្មីមួយ ស្ថិតនៅក្នុងភូមិក្រពើ ភូមិស្នារសង្គ្រាម ឃុំបល្ល័ង ស្រុកប្រាសាទបាគង ខេត្តសៀមរាប។
ក្រុមហ៊ុនទាំង៣ខាងលើ ដែលរកឃើញកំពុងបំពានច្បាប់ ត្រូវបានកម្លាំងចម្រុះដឹកនាំដោយសាលាខេត្តសៀមរាប ហើយការរកឃើញនេះ គឺធ្វើឡើងកាលពីថ្ងៃទី២៦ ខែកញ្ញា ឆ្នាំ២០១៨នេះ ដែលកម្លាំងចម្រុះទាំងនោះ បានចុះទៅដល់គោលដៅបទល្មើសតែម្តង។
តាមរយៈនៃការចុះទៅដល់គោលដៅនោះដែរ កម្លាំងចម្រុះដឹកនាំដោយលោក សុខ ថុល នាយករងរដ្ឋបាលសាលាខេត្តសៀមរាប បានរកឃើញថាក្រុមហ៊ុនទាំង៣កំពុងតែបំពានច្បាប់ ដោយក្រុមហ៊ុនទាំង៣នោះសមត្ថកិច្ចមិនបានបញ្ជាក់ឈ្មោះទេ។
លោក សុខ ថុល បានស្មើឲ្យក្រុមហ៊ុនទាំង៣ ផ្អាកសកម្មភាពជាបន្ទាន់ ហើយឲ្យសុំច្បាប់ទៅកាន់ច្រកចេញចូលតែមួយ របស់រដ្ឋបាលសាលាខេត្តសៀមរាបជាមុនសិន។ ក្រុមហ៊ុនទាំង៣ គឺបានប្រព្រឹត្តចាក់ដីលុបមាត់អាងទឹកត្រាវកុដិយ៉ាងច្រើន ហើយក៏មានធ្វើសំណង់នៅក្នុងមាត់ទឹកទាំងនោះផងដែរ។
សូមបញ្ជាក់ឲ្យដឹងផងដែរថា ជាច្រើនឆ្នាំបន្តបន្ទាប់មក គឺក្រុមហ៊ុនឯកជន បុគ្គល មួយចំនួនមានសិទ្ធស្របច្បាប់រួចទៅហើយក្នុងការកាន់កាប់ដីមាត់អាងត្រាវកុដិ ក្នុងស្រុកប្រាសាទបាគង ខេត្តសៀមរាប តាមរយៈការបំពានលុបមាត់អាងទឹក ហើយនឹងធ្វើសំណង់។ចុងក្រោយពួកគេទាំងនោះក្លាយទៅជាអ្នកស្របច្បាប់ក្នុងការគ្រប់គ្រងដីទាំងនោះ តាមរយៈទទួលប្លង់កម្មសិទ្ធស្របច្បាប់។
ចំពោះករណីរកឃើញការឃុបឃិតគ្នារបស់ក្រុមហ៊ុនទាំង៣ ដែលពុំមានច្បាប់អនុញ្ញាត្តិនោះ ហើយហ៊ានចាក់លុបដីមាត់អាងទឹករបស់រដ្ឋ ចាំមើលអាជ្ញាធរខេត្តសៀមរាបដោះស្រាយបន្តនៅវិធីណា៕
ប្រភពអត្ថបទ៖ រស្មីកម្ពុជា