កណ្តាលៈ កាលពីវេលាម៉ោង៨ៈ០នាទីព្រឹក ថ្ងៃទី២៦ ខែកញ្ញា ឆ្នាំ២០១៨ នៅចំណុចភូមិក្រងស្វាយ ឃុំស្វាយអំពារ ស្រុកមុខកំពូល។ មានហេតុការណ៏អគ្គីភ័យឆាបឆេះផ្ទះមួយខ្នង ដោយក្រុមគ្រួសារមួយ មានម្ចាស់ឈ្មោះចាន់ ម៉ៅ ភេទប្រុស អាយុ៤០ឆ្នាំ មុខរបរកសិករ មានលំនៅភូមិជុំកើតហេតុខាងលើ។ បានអុជធូបសែនម្តាយរបស់ខ្លួនទើបនឹងស្លាប់ថ្មីៗ លុះអុជរួចក៏នាំគ្នាចាក់សោទ្វារផ្ទះ រួចចាកចេញទៅបំពេញការងាររៀងៗខ្លួនអស់ ស្រាប់តែអកុសល កំទេចធូបបានធ្លាក់ បង្កឱ្យមានការឆាបឆេះផ្ទះអស់១ខ្នងមានទំហំ៥ម៉ែត្រ គុណនឹង៦ម៉ែត្រ ជាប្រភេទផ្ទះឈើ ប្រក់សង្ក័សី ជញ្ជាំងក្តារ ទាំងព្រឹក បង្កឱ្យមានការភ្ញាក់ផ្អើលឡើង។
តាមប្រភពពីជនរងគ្រោះជាម្ចាស់ផ្ទះ បានរៀបរាប់ប្រាប់ថា នៅថ្ងៃកើតហេតុ វេលាម៉ោង៧ព្រឹក គាត់រួមនឹងបងប្រុសឈ្មោះចាន់ ម៉េង បាននាំគ្នាអុជធូបសែនឱ្យម្តាយ ដែលទើបនិងស្លាប់មិនទាន់គ្រប់១០០ថ្ងៃ ហើយត្រូវដុតធូបឱ្យគ្រប់១០០ទើបឈប់។ លុះក្រោយពេលអុជធូបរួច ហើយក៏ចាក់សោចោល រួចនាំគ្នាចេញទៅធ្វើការបាត់អស់ ស្រាប់តែដល់ម៉ោង៨ៈ៣០នាទីព្រឹកថ្ងៃដដែល
ទើបប្រជាពលរដ្ឋនៅជិតនោះ ឃើញមានអណ្តាតភ្លើងឆេះឡើង ក៏ស្រែកឆោឡោនាំគ្នាមកជួយពន្លត់ និងរាយការណ៍មកនគរបាលប៉ុស្តិ៍ស្វាយអំពារ ហើយនគរបាលប៉ុស្តិ៍ស្វាយអំពារបាន រាយការអធិការនគរបាលស្រុកមុខកំពូល ហើយកម្លាំងជំនាញផ្នែកសណ្តាប់ធ្នាប់សាធារណស្រុក បានចេញជួយពន្លត់ ដោយប្រើប្រាស់ទឹកអស់១រថយន្ត ស្មើ៦ម៉ែត្រគូប ទើបរលត់ជាស្ថាពរនៅវេលាម៉ោង៩ព្រឹក។ តែអកុសលផ្ទះទាំងមូលត្រូវភ្លើងឆេះអស់ទាំងស្រុងទៅហើយ ៕