រាជធានីភ្នំពេញ ៖ ជនជាតិបរទេសប្រុសស្រី៥នាក់ កំពុងធ្វើដំណើរតាមផ្លូវ ទៅសណ្ឋាគារស្នាក់នៅ ស្រាប់តែលេចមុខជនសង្ស័យ៤នាក់ ចេញមកធ្វើសកម្មភាពឆក់កាបូបបានសម្រេច កាលពីវេលាម៉ោង ១១យប់ថ្ងៃទី២៦ខែកញ្ញា ឆ្នាំ២០១៨ តាមបណ្តោយផ្លូវ១៩កែងផ្លូវ១៧៨ នៅចំណុចម្តុំវត្តសារាវ័ន្ត ស្ថិតនៅក្នុងសង្កាត់ជ័យជំនះ ខណ្ឌដូនពេញ ។
សមត្ថកិច្ចបានប្រាប់ដឹងថា ជនបរទេសទាំង៥នាក់នោះ មិនបានប្រាប់ពីអត្តសញ្ញានោះទេ ដោយពួកគាត់កំពុងតែធ្វើដំណើរទៅសណ្ឋាគារ ដើម្បីស្នាក់នោះ ស្រាប់តែលេចមុខជនសង្ស័យចំនួន៤នាក់ ចេញមកធ្វើសកម្មភាពឆក់កាបូបពីស្រ្តីម្នាក់ បានសម្រេច ហើយក៏រត់គេចខ្លួនបាត់តែម្តង។
សមត្ថកិច្ចបានបន្តទៀតថា នៅក្នុងកាបូបរបស់គាត់មានទូរស័ព្ទដៃចំនួន២គ្រឿង មួយគ្រឿងម៉ាកiPhone 5 និងមួយគ្រឿងទៀតម៉ាកiPhone X ព្រម ទាំងលិខិតឆ្លងដែនចំនួន១ កាតATMមួយចំនួនទៀតផងដែរ ។
ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋជ័យជំនះដើម្បីអោយសមត្ថកិច្ចស្រាវជ្រាវតាមចាប់ជនសង្ស័យយកមកផ្តន្ទាទោសទៅតាមផ្លូវច្បាប់៕
ដោយ៖ ភារ៉ា