ភ្នំពេញៈ កាលពីព្រឹកថ្ងៃទី២៨ ខែកញ្ញា ឆ្នាំ២០១៨នេះ លោកសុង ប៉ ឯកអគ្គរដ្ឋទូតចិនចប់អាណត្តិប្រចាំនៅកម្ពុជា បានធ្វើការឡើងថ្លែង សំណេះសំណាលជួបសម្តែងការគួរសម និងជម្រាបលាសម្តេចក្រឡាហោម ស ខេង ដោយបាននិយាយថា មានជនជាតិចិនមួយចំនួនបានឆ្លៀតឱកាសធ្វើសកម្មភាពបទល្មើសផ្សេងៗទៀត ដែលធ្វើឲ្យប៉ះពាល់ទៅដល់អារម្មណ៍និងទឹកចិត្តរបស់ប្រជាជនកម្ពុជា ចំពោះប្រជាជនចិន។ លោកក៏សូមអរគុណដល់ក្រសួងមហាផ្ទៃកម្ពុជាដែលបានយកចិត្តទុកដាក់ ក្នុងការជួយបង្ក្រាបជនល្មើសជាជនជាតិចិន ដែលបានប្រព្រឹត្តបទល្មើសនៅកម្ពុជា។
លោកទូតបានបញ្ជាក់ថា ជាក់ស្តែងអាជ្ញាធរមានសមត្ថកិច្ចកម្ពុជាបានជួយលើការងារសន្តិសុខ ដូចជាការ បង្ក្រាបបទល្មើសផ្សេងៗបទល្មើសឆ្លងដែនការជួញដូរគ្រឿងញៀនការប្រព្រឹត្តអំពើពេស្យាចារផ្សេងៗនៅក្នុងទឹកដីកម្ពុជា ដែលសកម្មភាពទាំងនេះ បានធ្វើឲ្យប៉ះពាល់ជាច្រើនដល់ផលប្រយោជន៍របស់ប្រជាជនចិន នៅក្នុងទឹកដីចិន ក៏ដូចជាប៉ះពាល់រូបភាពនៃទំនាក់ទំនងរវាងប្រទេសទាំងពីរ។
ឯកអគ្គរដ្ឋទូតចិនចប់អាណត្តិ បញ្ជាក់ទៀតថា ទំនាក់ទំនងដ៏ល្អប្រសើររវាងប្រទេសទាំងពីរ គឺបានប្រកាន់ភ្ជាប់នូវការគោរពអធិបតេយ្យ និងឯករាជ្យភាពរវាងគ្នាទៅវិញទៅមក ដើម្បីការពារផលប្រយោជន៍រួមរបស់ជាតិនិងប្រជាជននៃប្រទេសទាំងពីរ។ លោកអរគុណចំពោះការផ្តល់នូវកិច្ចសហការដ៏ល្អ រវាងក្រសួងមហាផ្ទៃកម្ពុជាជាមួយអាជ្ញាធរមានសមត្ថកិច្ចរបស់ចិន ក្នុងការពង្រឹងការអនុវត្តច្បាប់ឲ្យកាន់តែល្អប្រសើររវាងប្រទេសទាំងពីរ ៕