ខេត្តប៉ៃលិន៖ កាលពីថ្ងៃទី១០ ខែតុលា ឆ្នាំ២០១៨ សមត្ថកិច្ចបានធ្វើការឃាត់ខ្លួនសមាជិកក្រុមប្រឹក្សាឃុំម្នាក់ តាមពាក្យបណ្ដឹងរបស់ជនរងគ្រោះជិត៥០នាក់ ដែលក្នុងនោះ មានទាំងមេភូមិម្នាក់ផង។ បន្ទាប់ពីឆបោកប្រាក់ប្រជាពលរដ្ឋជិត១០ម៉ឺនដុល្លារ ដើម្បីរត់ការចូលក្របខ័ណ្ឌប៉ូលិសខេត្តប៉ៃលិន តែបែរជាយកលុយគេទៅលេងល្បែង និងផឹកស៊ីអស់។
ជនសង្ស័យជាក្រុមប្រឹក្សាឃុំនោះ មានឈ្មោះ អេង ឡុង ភេទប្រុស អាយុ៥៣ឆ្នាំ មុខរបរជាសមាជិកក្រុមប្រឹក្សាឃុំស្ទឹងកាច់ ស្រុកសាលាក្រៅ ខេត្តប៉ៃលិន និងរស់នៅភូមិអូរបេង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ចំណែកជនរងគ្រោះម្នាក់ ក្នុងចំណោមជិត៥០នាក់ មានឈ្មោះ គង់ ស្រី ភេទស្រី អាយុ៥៩ឆ្នាំ មុខរបរជាមេភូមិអូររអិល ឃុំស្រុកកើតហេតុខាងលើ បានមកដាក់ពាក្យបណ្តឹងដល់សមត្ថកិច្ច ទើបធ្វើការឃាត់ខ្លួនមកសាកសួរតែម្ដង។
ក្រោយពីការសួរនាំ ជនសង្ស័យបានសារភាពថា ខ្លួនពិតជាបានទទួលប្រាក់ពីឈ្មោះ គង់ ស្រី ចំនួន៨៩,៥០០ដុល្លារ (ប្រាំបីម៉ឺនប្រាំបួនពាន់ប្រាំរយដុល្លារសហរដ្ឋអាមេរិក) ស្មើនឹងចំនួន៤៩នាក់ ដើម្បីរត់ការចូលក្របខ័ណ្ឌមន្ត្រីនគរបាលខេត្តប៉ៃលិន។ ចំពោះប្រាក់ទាំងនោះ ជនសង្ស័យបានយកទៅចាញ់ល្បែងនៅកាស៊ីណូ និងផឹកស៊ីអស់ហើយ គ្មានលុយសងវិញទេ។ ជនសង្ស័យកំពុងធ្វើការឃាត់ខ្លួនបណ្ដោះអាសន្ននៅស្នងការដ្ឋាននគរបាលខេត្តប៉ៃលិន ដើម្បីកសាងសំណុំរឿង និងបញ្ជូនទៅសាលាដំបូងខេត្តប៉ៃលិន បន្តចំណាត់ការតាមនីតិវិធី ៕
ដោយ៖ភត្រា្ត