បាត់ដំបងៈ កាលពីវេលាម៉ោង១២ៈ៣០នាទីថ្ងៃត្រង់ ថ្ងៃទី១៤ ខែតុលា ឆ្នាំ២០១៨ ស្ថិតនៅភូមិអូរតាគី ឃុំអូរតាគី ស្រុកថ្មគោល។ បុរសម្នាក់ មានឈ្មោះ ឌិន អាយុ២៥ឆ្នាំ ត្រូវកម្លាំងសមត្ថកិច្ចឃាត់ខ្លួន ក្រោយពីប្រើហិង្សាដ៏ឃោរឃៅវាយដំ និងយកទឹកក្ដៅជះទៅលើប្រពន្ធ មានឈ្មោះ សិទ្ធ រស្មី អាយុ៣៦ឆ្នាំ រស់នៅក្នុងភូមិ.ឃុំកើតហេតុខាងលើ។ បណ្ដាលឲ្យរបួសរលាកពេញរាងកាយ ដោយគ្រាន់តែប្រពន្ធហាមមិនឱ្យផឹកស្រាច្រើន។
អំពើហិង្សាដ៏ព្រៃផ្សៃនេះ បានកើតឡើងតាំងពីពាក់កណ្ដាលអធ្រាត្រថ្ងៃទី១៣ ខែតុលា ឆ្នាំ២០១៨ លុះនៅថ្ងៃទី១៤ តុលា ទើបត្រូវកម្លាំងរបស់លោកចុះឃាត់ខ្លួនបុរសជាប្ដី ក្រោយទទូលបានពាក្យបណ្ដឹងពីស្ត្រីជាប្រពន្ធដែលរងគ្រោះ។ បើតាមព័ត៏មានពីក្រុមគ្រួសារថា នៅយប់កើតហេតុ បុរសឈ្មោះ ឌិន ប្រុស នេះ បានផឹកស៊ីជាមួយបក្សពួកតាំងពីថ្ងៃរហូត ដល់ពាក់កណ្ដាលយប់ នៅតែមិនព្រមបំបែកហ្វូង។ ពេលនោះ ស្ត្រីជាប្រពន្ធបានណែនាំ និងហាមលោកប្ដីគំរក់រូបនេះ កុំឲ្យផឹកស្រាច្រើនពេកល្មមៗបានហើយ។ ប៉ុន្តែការណែនាំឬហាមប្រាមនេះ មិនបានធ្វើឲ្យលោកប្ដីសប្បាយចិត្តទេ។
ផ្ទុយទៅវិញកាន់តែធ្វើឲ្យលោកប្ដីក្ដៅចិត្តរហូតបង្កជាជម្លោះបែកផ្សែង។ ដោយសារខឹងប្រពន្ធហាមឃាត់មិនឲ្យផឹកស្រាច្រើន ភ្លាមនោះលោកប្ដីចិត្តតិរិច្ឆានរូបនេះ ក៏ស្ទុះទៅវាយដំប្រពន្ធ ហើយថែមទាំងស្ទុះទៅទាញឆ្នាំងទឹកក្ដៅជះស្រោចទៅលើប្រពន្ធទៀត បណ្ដាលឲ្យប្រពន្ធរងរបួសរលាកពេញរាងកាយ ៕
