នៅចាំបានទេ? អ្នកទាំង១៣នាក់នេះ!!! គ្រាន់តែរួចខ្លួនចេញពីរូងភ្នំភ្លាម ក្មេងទាំង១៣នាក់ អាចរកចំណូលរាប់លានបាត ពីការផ្ដល់ព័ត៌មានពិត ទៅកាន់ក្រុមហ៊ុនផលិតភាពយន្ដហូលីវូដ....

ប្រិយមិត្តមិនទាន់បានភ្លេចពីវត្តមានក្មេងទាំង ១២ នាក់ និង គ្រូបង្វឹកម្នាក់ ដែលបានជាប់គាំងក្នុងរូងភ្នំថាំហ្លួង ក្នុងឈៀងរ៉ៃ ភាគខាងជើងប្រទេសថៃទេមើល៍ទៅ ដោយពេលនេះមានព័ត៌មានថា រឿងរ៉ាវដែលពួកគេបានជាប់គាំងក្នុងរូងភ្នំនោះ ត្រូវបានក្រុមហ៊ុនហូលីវូដដ៏ធំលើពិភពលោកសម្រេចទិញយកទៅផលិតជាខ្សែភាពយន្ត បន្ទាប់ទទួលបានសាច់រឿងពេញក្នុងដៃពីការរៀបរាប់របស់ក្រុមបាល់ទាត់នោះ ។

មុនឆ្ពោះដល់ការផលិតជាសាច់រឿងឡើងសម្រាប់មនុស្សនៅជុំវិញពិភពលោកបានទស្សនា ក្រុមហ៊ុនទទួលការផលិតបានដកស្រង់បទពិសោធ និង រឿងរ៉ាវជា ច្រើនពីក្រុមបាល់ក្មេងដែលមាន ជ្រូកព្រៃ ក្នុងបទសម្ភាសន៍មួយជាមួយប្រព័ន្ធផ្សព្វផ្សាយបរទេស អំពីរឿងដ៏គួរឱ្យចាប់អារម្មណ៍ពួកគេដែលបានជាប់គាំង និង បានរួចផុតជីវិតពីរូងភ្នំថាំហ្លួង នៅខេត្តឈៀងរ៉ៃ កាលពីខែកក្កដាកន្លងទៅនេះ ។

តាមប្រភពកាសែត Wall Street Journal របស់សហរដ្ឋអាមេរិកដែលបានចុះផ្សាយពីព័ត៌មានរបស់ក្មេងៗទាំង ១២ នាក់ រួមទាំងគ្រូបង្វឹកម្នាក់នោះថា គ្រាន់តែដើម្បីទទួលព័ត៌មាននៃរឿងរ៉ាវរបស់ពួកគេយកទៅបង្កើតជាសាច់ រឿងនោះ ក្រុមហ៊ុនបានចំណាយប្រាក់យ៉ាងច្រើនទៅលើពួកគេម្នាក់ៗ ដោយក្នុងនោះក្នុងម្នាក់ៗគឺទទួលបានតម្លៃខ្លួនរហូតដល់ ៣.៧ លានបាត ប្រមាណ ១១៥ ០០០ ដុល្លារអាមេរិក ។

តាមប្រភព ខ្សែភាពយន្តនោះត្រូវបានបោះទុនផលិតឡើងដោយក្រុមហ៊ុន Universal Pictures ដែលជាស្ថាប័នផលិតខ្សែភាពយន្តហូលីវូដល្បីល្បាញលើពិភពលោក ហើយអ្នកដែលទទួលបានអាជ្ញាប័ណ្ណដើម្បីនាំយករឿងនេះ ទៅផលិតនោះ គឺលោក Michael DeLuca និង លោក Dave Bruce ដែលជាក្រុមជំនាញ និង មានវិជ្ជាជីវៈខ្ពស់ក្នុងការផលិតខ្សែភាពយន្តខ្សែល្អៗជាច្រើន ។

បើតាមរបាយការណ៍បានបញ្ជាក់ថា ក្រុមហ៊ុនហូលីវូដ Universal Pictures បានផ្តល់ឱ្យអ្នកផលិតខ្សែភាពយន្តនេះ នូវទឹកប្រាក់ចំនួន ៤៩ លានដុល្លារអាមេរិក ហើយក្នុងនេះត្រូវបានចែកចែកឱ្យកីឡាករ និង គ្រូបង្វឹកដែលមានគ្នាសរុប ១៣ នាក់ នូវម្នាក់ៗបានចំនួន ៣.៧ លានបាត ប្រហែល ១១៥ ០០០ ដុល្លារអាមេរិក ៕