ព្រះសីហនុៈ កាលពីវេលាម៉ោងជាង២រំលងអាធ្រាត ឈានចូលថ្ងៃទី១៨ ខែតុលា ឆ្នាំ២០១៨ ស្ថិតនៅក្នុងសណ្ឋាគារ J.R នៅក្រុម១៧ ភូមិ៤ សង្កាត់៤ ក្រុង-ខេត្តព្រះសីហនុ។ មានករណីហិង្សាគ្នា ជម្លោះស្នេហាបានធ្វើឲ្យបុរសជនជាតិចិន លើកបក្ខពួកមួយក្រុមប្រមាណជាង២០នាក់ ទៅព្រួតវ៉ៃបុរសជាជនបរទេស ជនជាតិរុស្ស៊ី និងបេឡារ៉ូស របួសធ្ងន់ និងស្រាលចំនួន០៧នាក់។
ជនរងគ្រោះទាំង៧នាក់ គឺជាមិត្តភ័ក្តិនឹងស្ត្រីជនជាតិចិន ដែលជាស្រីស្នេហ៍របស់ក្រុមជនសង្ស័យ។ បន្ទាប់ពីបានព្រួតគ្នាវ៉ៃទៅលើជនរងគ្រោះ ក្រុមជនសង្ស័យបាននាំគ្នារត់គេចខ្លួនបាត់អស់។
បើតាមសមត្ថកិច្ចបានឲ្យដឹងថា ករណីនេះកើតឡើងដោយសារតែ មានស្ត្រីជនជាតិចិនម្នាក់ឈ្មោះ XIA WEI XI អាយុ១៩ឆ្នាំ បានសុំមិត្តប្រុសរបស់គេឈ្មោះ XIA MING អាយុ៣០ឆ្នាំ ស្នាក់នៅសណ្ឋាគារ J.R បែកគ្នា បន្ទាប់មកនារីជនជាតិចិននោះ បាននាំបងស្រី និងមិត្តភក្តិរបស់ខ្លួនមានគ្នាចំនួន ៧នាក់ ក្នុងនោះមាន ជនជាតិសរុស្ស៊ី ចំនួន២នាក់ ជនជាតិបេឡារ៉ូសចំនួន១នាក់ និងជនជាតិចិនចំនួន៤នាក់ ទៅយកឥវ៉ាន់នៅសណ្ឋាគារ J.R នៅដែលពេលទៅដល់ មិត្តប្រុសរបស់ស្ត្រីជនជាតិចិនរូបនោះ បាននាំគ្នាមកព្រួតវ៉ៃទៅលើក្រុមជនរងគ្រោះ បណ្តាលឲ្យរងរបួសធ្ងន់១នាក់ ជាជនជាតិបេឡារ៉ូស និង៦នាក់ទៀតរងរបួសស្រាល។ ចំណែកជនរងគ្រោះដែលរងរបួសធ្ងន់ បានបញ្ជូនទៅសំរាកព្យាបាលនៅមន្ទីពេទ្យបង្អែកខេត្តព្រះសីហនុ ៕
