ភ្នំពេញៈ កាលពីយប់ថ្ងៃទី២៣ ខែតុលា ឆ្នាំ២០១៨ កងរាជអាវុធហត្ថរាជធានីភ្នំពេញ បានឲ្យដឹងថា គេបានឃាត់រថយន្ត របស់គ្លីនិក និងសម្ភពរស្មី មួយគ្រឿង គ្រាដែលរថយន្តនោះចេញដឹកជនរងគ្រោះ ដោយគ្រោះថ្នាក់ចរាចរណ៍នៅតាមផ្លូវវេងស្រេង ភូមិត្រពាំងថ្លឹង សង្កាត់ចោមចៅ១ ខណ្ឌពោធិសែនជ័យ ដោយល្មើសសេចក្ដីណែនាំ។ គេបានប្រដេញចាប់រថយន្តនោះ រហូតដល់ទីតាំងគ្លីនិករស្មី នៅទល់មុខព្រលានយន្តហោះ ផ្លូវសហព័ន្ធរុស្សី ក្នុងភូមិក្បាលដំរី២ សង្កាត់កាកាប២ ខណ្ឌពោធិសែនជ័យ។ ចំណែកជននរងគ្រោះ ដែលរថយន្តគ្លីនិករស្មី ដឹកយកទៅនោះ ត្រូវបានសមត្ថកិច្ចផ្ទេរទៅឲ្យរថយន្តសង្រ្គោះរបស់អង្គភាព៧១១ កងពលតូចលេខ៧០ដឹកបញ្ជូនយកទៅមន្ទីរពេទ្យកាល់ម៉ែត ។
គួរបញ្ជាក់ថា កន្លងទៅដោយសារភាពអនាធិបតេយ្យ និងកង្វះការទទួលខុសត្រូវ ក្រសួងសុខាភិបាលបានធ្វើការហាមប្រាមមិនឲ្យគ្លីនិកឯកជនទទួលដឹកជនរងគ្រោះ ពិសេសជនរងគ្រោះដោយគ្រោះថ្នាក់ចរាចរណ៍ ដោយទុកភារៈនេះ ឲ្យរថយន្តសាមុយ របស់មន្ទីរពេទ្យរដ្ឋ។ ប៉ុន្តែបើទោះជាដូច្នេះក្ដីម្ដងម្កាលគេឃើញរថយន្តឯកជនឆក់ឱកាសបំពានលើបំរាមនេះ ៕