អ៊ុំអើយអ៊ុំ...រឿងតិចតួចនិងបងប្អូនបង្កើតឯសោះក៏មិនអត់ឱនឲ្យដែរ ទីបំផុតរកគុកឃើញ! ជនដៃដល់ម្នាក់ និងកាំភ្លើងខ្លីមួយដើម ព្រមទាំងកាំបុិតមួយ ត្រូវនគរបាលស្រុកសាលាក្រៅឃាត់ ក្រោយពីបង្ក....

ខេត្តប៉ៃលិន ៖ កម្លាំងជំនាញនៃអធិការដ្ឋាននគរបាលស្រុកសាលាក្រៅ បានឃាត់ខ្លួនជនដៃដល់ម្នាក់ និងដកហូតកាំភ្លើងខ្លី និងកាំបុិតមួយ កាលពីវេលាម៉ោង៨និង៣០នាទីយប់ ថ្ងៃទី២៥ ខែតុលា ឆ្នាំ២០១៨ ក្រោយពីបង្កហិង្សាដោយចេតនា មានស្ថានទម្ងន់ទោស ទៅលើប្អូនបង្កើតរបស់ខ្លួន នៅចម្ការស្វាយ ភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន។

ជនរងគ្រោះមានឈ្មោះ អៀម សុផានី អាយុ៥៣ឆ្នាំ មុខរបរ កសិកររស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន។ ចំណែកជនសង្ស័យឈ្មោះ អៀម សុកល ភេទប្រុស អាយុ៥៧ឆ្នាំ មុខរបរនិងទីលំនៅមិនពិតប្រាកដ ត្រូវជាបងបង្កើតរបស់ជនរងគ្រោះ។

ជនសង្ស័យមានសភាពស្រវឹង បានយកកាំបិតចិតបន្លែ កាប់ទៅលើជនរងគ្រោះបណ្ដាលឲ្យរងរបួស២កន្លែង ត្រង់កែងដៃស្ដាំ និងភ្លៅខាងស្ដាំ។

ក្រោយពីធ្វើការឃាត់ខ្លួនជនសង្ស័យខាងលើ រហូតដល់ វេលាម៉ោង៨និង៣០ ព្រឹកថ្ងៃទី ២៦ ខែតុលា ឆ្នាំ២០១៨ កម្លាំងជំនាញនៃអធិការដ្ឋាននគរបាលស្រុកសាលាក្រៅ បានឈានទៅដល់ការចាប់យកវត្ថុតាង នូវអាវុធខ្លីចំនួន១ដើមទៀត ដែលជនសង្ស័យបានលាក់ទុក។