ឪពុកម្តាយ ប្តឹងសមត្ថកិច្ចថា មានគេចាប់ពង្រាត់កូនស្រីខ្លួន តែដល់ពេលមកស្តាប់ក្មេងស្រីនិយាយ ទើបដឹងថា ឪពុកម្តាយនាងធ្វើ...

នៅថ្ងៃទី០១ ខែវិច្ឆិកា ឆ្នាំ២០១៨ មានហេតុការណ៍ដ៏គួរឲ្យភ្ញាក់ផ្អើលមួយបានកើតឡើង រហូតដល់សមត្ថកិច្ចធ្វើការឃាត់ខ្លួនក្មេងស្រីម្នាក់ ពីបទចាប់ពង្រាត់កូនក្រមុំគេ ខណៈពេលដែលកូនស្រីរបស់គាត់ បានប្រាប់ទៅសមត្ថកិច្ចថា រូបនាងជាអ្នកចង់រត់ចោលឪពុកម្តាយ ដោយមិនមានអ្នកចាប់ពង្រាត់អីនោះទេ។ ដែលហេតុការណ៍នេះបានកើតឡើងលើផ្លូវជាតិលេខ78A ជិតវត្តអូចេង ស្ថិតនៅភូមិតាអង ឃុំតាអង ស្រុកកូនមុំ។

បើយោងតាមសមត្ថកិច្ចបានប្រាប់ឲ្យដឹងថា ក្មេងស្រីដែលប្រុងនឹងរត់ចោលឪពុកម្តាយនោះមានឈ្មោះថា ថេង ស្រីលិន អាយុ១៧ឆ្នាំ មុខរបរដើរស៊ីឈ្នួលជៀជ័រកៅស៊ូ ចំណែកក្មេងស្រីដែលត្រូវបានគេចោទនោះមានឈ្មោះថា ញ៉ែម ឡា អាយុ៣១ឆ្នាំ មុខរបរដូចគ្នា អ្នកទាំង២នាក់មានផ្ទះជាប់គ្នាស្ថិតនៅភូមិការឡែង ឃុំការឡែង ស្រុកលំផាត់។

ក្មេងស្រីខាងលើ បានប្រាប់ទៅកាន់សមត្ថកិច្ចថា សព្វថ្ងៃនាង មានមុខរបរជាអ្នកជៀជ័រ ជិតរយៈពេល២ឆ្នាំហើយ។ ក្មេងស្រីរូបនោះក៏បានប្រាប់ទៀតថា មានពេលខ្លះនាងមានជំងឺគ្រុនម្តងៗ ធ្វើការមិនកើត ឪពុកម្តាយនាងតែងតែបង្ខំនាងឲ្យទៅជៀជ័រ ទាំងភ្លៀងរលឹម នាងប្រាប់ថា នាងឈឺទៅមិនកើតទេ ។ ពេលលឺថានាងឈឺ ឪពុកនាងទាញដំបងដេញវាយនាង និងជេរប្រមាថនាងជាកូនគ្រប់បែបយ៉ាង មិនតែប៉ុនណោះ ម្តាយនាងបានទាញដំបងដេញវាយនាងត្រូវពីរទៅបីដំបងក៏មានដែរ។

ក្មេងស្រីបានបន្តប្រាប់ទៀតថា រឿងយកដំបងដេញវាយនាង និងជេរប្រមាថនាងបានកើតឡើងញឹកញាប់ណាស់ មានពេលខ្លះនាងបានរត់ទៅគេងនៅផ្ទះអ្នកជិតខាងក៏មាន។ លុះដល់ថ្ងៃកើតហេតុ នាងក៏បានសម្រេចចិត្តរត់តាមមីងម្នាក់ជាអ្នកភូមិជាមួយគ្នា ទៅខេត្តសៀមរាប ដើម្បីគេចពីឪពុកម្តាយ ឲ្យនាងមានសេរីភាពដូចគេ ដូចឯង និងស្វែងរងការងារធ្វើ មិនទាន់នឹងបានចេញពីផ្ទះស្រួលបួលផង ឪពុកនាងក៏ទៅប្តឹងប៉ូលិសតែម្តង។

ដោយឡែកស្ត្រីឈ្មោះ ញ៉ែមឡា រងការចោទបានបំភ្លឺប្រាប់ថា គាត់មានផ្ទះជាប់គ្នាជាមួយក្មេងស្រីខាងលើក្នុងមួយថ្ងៃៗឃើញក្មេងស្រីរូបនោះទឹកភ្នែកស្ទើររាល់ថ្ងៃ ដោយសារតែម្ដាយឪពុកនាងជេរប្រមាថ និងវាយដំជាញឹកញាប់ ហើយគាត់មហាសែនអាណិតខ្លាំងណាស់ ស្រាប់តែថ្ងៃកើតហេតុគាត់ទៅលេងម្ដាយនៅខេត្តសៀមរាប ក្មេងស្រីរូបនេះរត់តាមគាត់សុំទៅជាមួយដើម្បីរកកាងារធ្វើ ទោះហាមនាងយ៉ាងណាក៏មិនព្រមស្ដាប់ដែរ ទើបមានរឿងចោទប្រកាន់នេះកើតឡើងតែម្តង។ ក្រោយពីសួរនាំភាគគីទាំងសងខាង ទើបសមត្ថកិច្ចដឹងរឿងពិតគឺគ្មានរឿងចាប់ពង្រាត់ទេ រឿងកើតឡើងនេះមកពីម្ដាយឪពុកនាងវាយធ្វើបាបកូនស្រីញឹកញាប់ពេក ក្រោយពីសួរនាំហើយ សមត្ថកិច្ចសុំយោបល់ទៅតំណាងអយ្យការសាលាដំបូងខេត្ត ទើបតំណាងអយ្យការសម្រេចដោះលែងស្ត្រីរងការចោទឱ្យមានសេរីភាពវិញ ។

ក្រោយពេលដែលធ្វើការសួរនាំរួចហើយ សមត្ថកិច្ចតេក៏បានបញ្ជូនក្មេងស្រីទៅឪពុកម្តាយវិញ ប៉ុន្តែនាងមិនចង់ទៅនៅវិញទេ សុខចិត្តនៅជាមួយប៉ូលិសល្អជាង។ នៅក្នុងពេលនោះផងដែរ ប៉ូលិសលួងលោមនាងយ៉ាងយូរទើបនាង ព្រម នៅពេលដែលឪពុកម្តាយនាង ធ្វើកិច្ចសន្យាជាលាយលក្ខណ៍ជាអក្សរ ឈប់ប្រើអំពើហឹង្សាលើកូនស្រីទៀត ទើបនាងយល់ព្រមទៅ ជាមួយគ្រួសារនាងវិញ៕

ដោយ៖ ភារ៉ា

ហាមដាច់ខាតការយកអត្ថបទ ពីវេបសាយ khmernews.news ដោយគ្មានការអនុញាត។