ប្រទេសហ្វីលីពីនៈ នៅព្រឹក​ថ្ងៃទី០២ ខែវិច្ឆិកា ឆ្នាំ២០១៨ តាមទីភ្នាក់ងារព័ត៌មាន​ចិន ស៉ីនហួរ បាន​ផ្សាយថាៈ លោក​ Francis Tolentino ​ទីប្រឹក្សា ជាន់ខ្ពស់ របស់ប្រធានាធិបតី Rodrigo Duterte ​ បានបញ្ជាក់ថាៈ មានមនុស្ស ជាង ៥,៧លាននាក់ រងផលប៉ះពាល់ដោយព្យុះ។ ជាមួយគ្នានេះដែរ នៅក្នុងខែវិច្ឆិកានេះ នឹងមានព្យុះកំណាចពីរទៀត នឹងវាយប្រហារមកលើហ្វីលីពីន ។ អាជ្ញាធរតាមដាន​អាកាសធាតុហ្វីលីពីន​បានព្យាករណ៍ថា ប្រទេសហ្វីលីពីន អាចនឹងទទួលរង​ការវាយប្រហារ ដោយព្យុះទីហ្វុងមួយ ឬពីរទៀត​ក្នុង​ខែ​វិច្ឆិកានេះ។ ព្រោះកាលពីខែតុលាកន្លងមក ព្យុះ ​Mangkhut ​បានវាយប្រហារហ្វីលីពីន បណ្តាលឲ្យមនុស្ស ៦៤នាក់ ត្រូវស្លាប់​ ជាច្រើនស្លាប់និងរបួស ដោយសារតែបាក់ដីនឹងទឹកជំនន់។ 

បើតាមអ្នកជំនាញ​ផ្នែកឧតុនិយមហ្វីលីពីន ជាទូទៅនាអំឡុងពេល​ចុងឆ្នាំបែបនេះ ព្យុះទីហ្វុងភាគច្រើន​តែងវាយលុកលើ​តំបន់​ភាគ​កណ្តាល​ និងភាគ​ខាងត្បូងប្រទេសហ្វីលីពីន ហើយពួកវានឹងវិវត្តន៍​ខ្លួនឡើងនៅលើមហាសមុទ្រ​ប៉ាស៉ីហ្វិក ឬនៅក្នុងដែន​សមុទ្រ​នៃ​ប្រទេសហ្វីលីពីន​តែម្តង។

គួរជម្រាបថា ថ្មីៗនេះ​ព្យុះទីហ្វុង​ឈ្មោះថា យូទូ (Yutu) ដែលបានសម្លាប់​ជីវិតមនុស្ស​យ៉ាងតិច ១៥នាក់ និងធ្វើឲ្យមនុស្សជាច្រើន​នាក់ទៀតបាត់ខ្លួន​នោះ ទើបតែបានចាកចេញ​ពីទឹកដីហ្វីលីពីន​ កាលពីថ្ងៃពុធ​សប្តាហ៍មុន​ប៉ុណ្ណោះ។ បើតាមអ្នក​ជំនាញ​ ហ្វីលីពីនតែងទទួលរងគ្រោះ​ពី​​ព្យុះទីហ្វុង​កម្រិតធ្ងន់ នាអំឡុងត្រីមាស​ចុងក្រោយជារៀង​រាល់ឆ្នាំ។ ព្យុះទីហ្វុង Yutu គឺជាព្យុះ​ទីហ្វុង ទី១៨ ដែលបានវាយប្រហារ​​លើ​​ហ្វីលីពីន​ ក្នុងឆ្នាំ២០១៨ ខណៈប្រទេស​អាស៊ាននេះ ជាធម្មតារង​ការវាយលុក​ពីព្យុះទីហ្វុង​ ជាមធ្យមចំនួន២០ ពីមួយឆ្នាំ​ទៅមួយឆ្នាំ ៕