តាកែវៈ នៅថ្ងៃទី១៣ ខែវិច្ឆិកា ឆ្នាំ២០១៨ អគ្គនាយកដ្ឋានកាំកុងត្រូល សហការជាមួយមន្ត្រីកាំកុងត្រូលខេត្តតាកែវ បានចុះមកត្រួតពិនិត្យ តាមបណ្ដាលស្ថានីយ និងដេប៉ូប្រេងសាំង នៅក្នុងខេត្តតាកែវ ពីសំណាក់រថយន្តពិសោធន៍ចល័ត បានរកឃើញស្ថានីយ និងដេប៉ូលក់ប្រេងសាំងចំនួន១៣កន្លែង ក្នុងនោះមាន៩កន្លែង លក់មិនមានភាពប្រក្រតីនោះទេ។
ក្នុងចំណោមស្ថាននីយ និងដេប៉ូប្រេងសាំង ដែលធ្វើការត្រួតពិនិត្យបានរកឃើញមានស្ថានីយ និងដេប៉ូប្រេងសាំងចំនួន៤ទីតាំង មានអនុលោមភាពទាំងផ្នែកគុណភាព និងបរិមាណ។ ២ទីតាំងមិនមានអនុលោមភាពទាំងផ្នែកគុណភាព និងបរិមាណ ដោយឡែក៧ទីតាំងទៀត គឺមិនមានអនុលោមភាពផ្នែកបរិមាណ។
ចំពោះថ្លៃលក់រាយរបស់ស្ថានីយ និងដេប៉ូប្រេងសាំងទាំង១៣ទីតាំង បានអនុវត្តន៍ត្រឹមត្រូវ តាមសេចក្តីជូនដំណឹងរបស់ក្រសួងពាណិជ្ជកម្ម។ ចំពោះស្ថាននីយប្រេងសាំងលក់មិនមានគុណភាព មន្ត្រីជំនាញបានដកហូតយកគំរូទៅវិភាគ នៅអគ្គនាយកដ្ឋានកាំកុងត្រូល ហើយបើយើងរកឃើញថា ប្រេងសាំងទាំងអស់នេះ នៅតែលក់មិនគ្រប់លីត្រ និងមិនមានគុណភាពដូចអ្វីដែលយើងពិនិត្យ នៅរថយន្តពិសោធន៍ យើងនឹងចាត់វិធានការណ៍តាមផ្លូវច្បាប់ ស្ដីពីការគ្រប់គ្រងទំនិញ និងសេវា។
ស្ថានីយ និងដេប៉ូចែកចាយប្រេងសាំង២ ដែលខុសទាំងបរិមាណ និងគ្មានគុណភាពនោះ គឺដេប៉ូរបស់លោក ឈាវ លាំង ដែលមានទីតាំងនៅក្នុងស្រុកត្រាំកក់ និងមួយទៀតជាដេប៉ូរបស់លោក ជៀក ច្រូវ។ ដោយឡែកស្ថាននីយ៍ និងដេប៉ូ៧ទៀត ដែលលក់ខុសបរិមាណ គឺភាគច្រើនស្ថិតនៅក្នុងស្រុកត្រាំកក់ និងមួយទៀតជាដេប៉ូចែកចាយប្រេងសាំងសាវីម៉ិចរបស់លោកស្រី ណុប ម៉ារីយ៉ាន ដែលមានទីតាំងនៅក្នុងក្រុងដូនកែវ ៕