ភ្នំពេញៈ កាលពីថ្ងៃទី២២ ខែវិច្ឆិកា ឆ្នាំ២០១៨ ត្រង់ចំណុចមុខហាងសាំងតេលា ផ្លូវ៥៩៨ ក្រុមទី៤ ភូមិ៤ សង្កាត់ច្រាំងចំរេះទី១ ខណ្ឌឬស្សីកែវ។ មានករណីឆក់ទូរស័ព្ទដៃមួយ ដោយជនសង្ស័យមាន២នាក់ មានឈ្មោះ ថុន បុរី ភេទប្រុសអាយុ ១៨ឆ្នាំ មុខរបរគ្មាន (មានសារធាតុញៀន) ជាអ្នកបើកម៉ូតូម៉ាក ប៊ីត ពណ៌សលាយខៀវ ពាក់ស្លាកលេខភ្នំពេញ 1HD -2002។ ម្នាក់ទៀត មានឈ្មោះ និត ចន្ថា ភេទប្រុស អាយុ១៩ឆ្នាំ មុខរបរជាងឡាន (មានសារធាតុញៀន) ជាអ្នកធ្វើសកម្មភាពឆក់ ទូរស័ព្ទដៃបុរសម្នាក់ មានឈ្មោះ សុខ ភារម្យ ភេទប្រុស អាយុ៤០ឆ្នាំ ស្នាក់នៅផ្ទះលេខ០៨៩ ផ្លូវរថភ្លើងក្រុមទី៩ ភូមិបឹងសាឡាង សង្កាត់ឬស្សីកែវ។ បានសំរេច តែត្រូវសមត្ថកិច្ចស្ទាក់ចាប់បានវិញ។
ក្រោយពីចាប់បានជនសង្ស័យទាំង២នាក់រួចមក សមត្ថកិច្ចធ្វើការកំណត់ជនសង្ស័យជាបក្ខពួក ចំនួន៤នាក់ទៀតមានឈ្មោះ ផេង ដារ៉ាត់ ភេទប្រុស អាយុ១៨ឆ្នាំ មុខរបរគ្មាន ស្នាក់នៅភូមិស្វាយ ឃុំឈ្វាំង ស្រុកពញ្ញាឮ ខេត្តកណ្តាល (មានសារធាតុញៀន) ជាបក្ខពួក។ ឈ្មោះ គក់ រតនា ភេទប្រុស អាយុ១៨ឆ្នាំ មុខរបរជាងម៉ូតូ ស្នាក់នៅភូមិប្រាសាទ ឃុំឈ្វាំង ស្រុកពញ្ញាឮ ខេត្តកណ្តាល (គ្មានសារធាតុញៀន) បក្ខពួក។ ឈ្មោះ រ៉ន រុំ ភេទប្រុស អាយុ១៨ឆ្នាំ មុខរបរកម្មករ ស្នាក់នៅភូមិស្វាយ ឃុំឈ្វាំង ស្រុកពញ្ញាឮ ខេត្តកណ្តាល (គ្មានសារធាតុញៀន) បក្ខពួក។ ឈ្មោះ ហម បញ្ញា ភេទប្រុស អាយុ២០ឆ្នាំ មុខរបរកម្មករ ស្នាក់នៅភូមិធំសង្កាត់ព្រែកភ្នៅ ខណ្ឌព្រែកភ្នៅ (មានសារធាតុញៀន) បក្ខពួក។
សម្ភារៈដកហូតបានរួមមានៈ ម៉ូតូ២គ្រឿង ម៉ាក ប៊ីត ពណ៌សលាយខៀវ១គ្រឿង ពាក់ស្លាកលេខភ្នំពេញ 1HD-2002 (ម៉ូតូជិះធ្វើសកម្មភាព) និងមួយគ្រឿងទៀត ម៉ាក C110 ពណ៌ខ្មៅ ស៊េរី២០១២ ពាក់ស្លាកលេខភ្នំពេញ 1BQ-1086។ ទូរស័ព្ទចំនួន៤គ្រឿង ម៉ាកអាយហ្វូនភ្លើស ពណ៌ខ្មៅ១គ្រឿង (ជារបស់ជនរងគ្រោះ) ម៉ាកអាយហ្វូនស៊ិច ពណ៌ស១គ្រឿង របស់ជនសង្ស័យ និងម៉ាកនូគា (អ៊ិនចុចពិល៣គ្រឿង) របស់ជនសង្ស័យ។
ឃាត់ខ្លួនជនសង្ស័យទាំង៦នាក់ ត្រូវបានបញ្ជូនទៅអធិការដ្ធាននគរបាលខណ្ឌឬស្សីកែវ កសាងសំណុំរឿង និងបន្តធ្វើការស្រាវជ្រាវរកបក្ខពួកបន្ថែម ដើម្បីបញ្ជូនមកអនុវត្តន៍តាមនិតិវិធី ៕
