ភ្នំពេញៈ កាលពីវេលាម៉ោង៤ៈ៣០នាទីទៀបភ្លឺ ថ្ងៃទី២៤ ខែវិច្ឆិកា ឆ្នាំ២០១៨ មានករណីចោរចូលលួចកាច់សោ.ក ម៉ូតូ១គ្រឿងម៉ាក Suzuki Nex ពណ៌ស ពាក់ស្លាកលេខ ស្វាយរៀង 1K-8392 ។ របស់បុរសម្នាក់ មានឈ្មោះ ជា សាមឌី ភេទប្រុស អាយុ៣០ឆ្នាំ មុខរបរសន្តិសុខយាមបុរីតាង៉ូវ ស្នាក់នៅតូបយាមមុខច្រកចូលបុរីតាង៉ូវ ភូមិអូរអណ្ដូងមួយ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ មានស្រុកកំណើតនៅភូមិក្រោលគោ ស្រុកស្វាយជ្រុំ ខេត្តស្វាយរៀង។ ទៅដោយសុវត្តិភាព។
ក្រោយពេលកើតហេតុ ជនរងគ្រោះបានជិះ PassApp ទៅដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលនិរោធ ដើម្បីឲ្យសមត្ថកិច្ចជួយស្រាវជ្រាវតាមរកជនសង្ស័យ។
ហើយនៅវេលាម៉ោង៥ៈ២០នាទីទាបភ្លឺ ថ្ងៃខែដដែលនោះ មានករណីវាយប្លន់យកម៉ូតូបានសម្រេច នៅមុខអាស្រមវិមាននាគរត័វង្គត់បុរី លើកំណាត់ផ្លូវ៣៦៩ សង្កាត់ព្រែកប្រា ខណ្ឌច្បារអំពៅ។ ខណៈដែលមានប្រុសស្រីមួយក្រុម ជិះម៉ូតូត្រឡប់មកពីដើរលេងបុណ្យអុំទូកវិញ ត្រូវបានជនសង្ស័យមួយក្រុម បានធ្វើសកម្មភាពវាយប្លន់យកម៉ូតូ១គ្រឿង បានសម្រេច រួចជិះគេចខ្លួនបាត់ដោយសុវត្ថិភាព មិនរំខានសមត្ថកិច្ចប៉ុស្តិ៍ព្រែកប្រា ចេញអន្តរាគមន៍ឡើយ។
ក្រោយពេលកើតហេតុ ជនរងគ្រោះបាននាំគ្នាមកដាក់ពាក្យបណ្ដឹងនៅប៉ុស្តិ៍នគរបាលនិរោធ តែសមត្ថកិច្ចប៉ុស្តិ៍និរោធបានប្រាប់ឲ្យជនរងគ្រោះទាំងនោះ ទៅដាក់ពាក្យបណ្ដឹង នៅប៉ុស្តិ៍នគរបាលសង្កាត់ព្រែកប្រាវិញ ទើបជនរងគ្រោះក៏បានជិះម៉ូតូចេញទៅបាត់អស់ ៕
