គ្រប់ហើយលោកបងចោរមួយជើងនេះ! ចោរគាស់ផ្ទះ ក្នុងបុរីចំការមន សង្កាត់ទន្លេបាសាក់ លួចយកទូូដែក សរុបលុយប្រមាណ ២៩៧,០០០ដុល្លារ

ភ្នំពេញៈ កាលពីព្រឹកថ្ងៃទី២៤ ខែវិច្ឆិកា ឆ្នាំ២០១៨ មន្ត្រីនគរបាលនៃស្នងការដ្ឋាននគរបាលរាជធានីភ្នំពេញ បានឲ្យដឹងថា ម្ចាស់រងគ្រោះជនជាតិចិន ចូលសញ្ជាតិខ្មែរ ឈ្មោះ LI TAO ភេទប្រុស អាយុ៤១ឆ្នាំ មុខរបរ អ្នកជំនួញ រស់នៅក្នុងផ្ទះលេខD២៩ បុរីចំការមន ផ្លូវDបេតុង ក្រុម៦ ភូមិទី១០ សង្កាត់ទន្លេបាសាក់ ខណ្ឌចំការមន។

ត្រូវបានលោកចោរមិនស្គាល់មុខចូលគាស់ផ្ទះ លួចទ្រព្យសម្បត្តិរួមមាន ចិញ្ចៀនលោហធាតុពណ៌ស១វង់ តម្លៃប្រហែល១៥,០០០ដុល្លារ កងដៃលោហធាតុពណ៌ស ដាំត្បូងពេជ្រតម្លៃ ១០,០០០ម៉ឺនដុល្លារ ក្រវិលដាំត្បូងពេជ្រ១គូរ តម្លៃប្រហែល៣ម៉ឺនដុល្លារ ចិញ្ចៀននិងខ្សែ.ក លោហធាតុពណ៌ស មួយចំនួនទៀតប្រហែល ១០,០០០ម៉ឺនដុល្លារ បណ្ណបញ្ញើប្រាក់ធនាគារប្រៃណីយ៍១សន្លឹក លុយចំនួន៣ម៉ឺនដុល្លារ កាក់មាសប្រាក់ប្រហែល៥០កាក់ តម្លៃ៣ម៉ឺនដុល្លារជាង កាបូបស្ពាយម៉ាក LV ពណ៌ខ្មៅមួយតម្លៃ២,០០០ដុល្លារ ប្លង់ផ្ទះលេខC៦០២ វិមានកូលាប១ប្លង់ដីនៅសង្កាត់ភ្នំពេញថ្មី១សន្លឹក ប្លង់ផ្ទះលេខ៩២៣-SA (C២) នៅសង្កាត់អូរឡាំពិក ប្លង់ខុនដូររីវើវ៉ាកោះពេជ្រ១ ពាក្យស្នើរកាន់កាប់ដីធ្លីនៅខេត្តសៀមរាម១សន្លឹក នាឡិការដៃចំនួន៤គ្រឿង សរុបតម្លៃ១៦ម៉ឺនដុល្លារ ចិញ្ចៀនពេជ្រ១គ្រាប់ តម្លៃ៤ម៉ឺនដុល្លារ។ សម្ភារៈដកហូតស្លាកស្នាមក្រយ៉ៅម្រាមដៃ១កន្លែង។

បើតាមឈ្មោះ ដា ធារី ភេទស្រី អាយុ៣០ឆ្នាំ ជាអ្នកបម្រើ ទីលំនៅផ្ទះកើតហេតុខាងលើ បានអោយដឹងថា នៅវេលាម៉ោង៧ៈ២០នាទី ថ្ងៃទី២១ ខែវិច្ឆិកា ម្ចាស់ផ្ទះ និងក្រុមគ្រួសារបានចេញទៅដើរលេងបាត់។ ចំណែកនាងខ្ញុំក៏នៅបោសសំអាតផ្ទះ រួចរហូតដល់ម៉ោង១២ៈ២០នាទី នាងខ្ញុំចាក់សោរទ្វារផ្ទះ ហើយទ្វាររបង គ្រាន់តែខ្ទាស់ពុំមានចាក់សោរទេ រួចហើយចេញទៅផ្ទះរបស់នាងនៅកៀនស្វាយ ខេត្តកណ្តាល។ លុះដល់ថ្ងៃទី២៤ ខែវិច្ឆិកា វេលាម៉ោង៨ៈ៣០នាទី នាងខ្ញុំក៏ត្រឡប់មកវិញ ស្រាប់តែឃើញទ្វារផ្ទះគ្រាន់តែបិទផ្អឹប និងកូនសោរឡាន និងសោរផ្ទះនៅលើកៅអីខាងក្រៅ នាងញុំក៏ឡើងទៅលើផ្ទះ ឃើញទូរដែកក្នុងបន្ទប់ម្ចាស់ផ្ទះបាត់ នាងខ្ញុំក៏ទូរស័ព្ទទៅអ្នកបកប្រែម្ចាស់ផ្ទះ អោយប្រាប់ទៅម្ចាស់ផ្ទះថា មានចោរចូលលួចទូរដែក។ បច្ចុប្បន្នកម្លាំងជំនាញកំពុងស្វែងរកចាប់ខ្លួនជនសង្ស័យ ដើម្បីយកមកផ្តន្ទាទោសតាមផ្លូវច្បាប់ ៕