យុវជន២នាក់ នាំគ្នាផឹកស៊ីស្រវឹង បែកគំនិតចង់សប្បាយ ក៏ទៅបបួលនារីរកស៊ីផ្លូវភេទនៅវត្តភ្នំ ដើម្បីគេងជាមួយ មិនទាន់នឹងបានឡើងឋានសួគ៌ផង ត្រូវនាងៗលួចយកទូរស័ព្ទ iPhone6 បាត់ ផ្អើលសមត្ថកិច្ច

ភ្នំពេញៈ កាលពីវេលាយប់រំលងអធ្រាត្រ ឈានចូលថ្ងៃទី២៧ ខែវិច្ឆិកា ឆ្នាំ២០១៨ តាមបណ្តោយផ្លូវទំនប់៧០ នៅចំណុចរ៉ារថភ្លើង ស្ថិតនៅក្នុងសង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ។ យុវជន២នាក់មិត្តភក្តិបានផឹកស៊ីស្រវឹងស្រាហើយគិតថា ចង់ទៅសប្បាយដោយបបួលគ្នាទៅយកស្រីនៅវត្តភ្នំដេក។

ខណៈដែលជិះម៉ូតូទៅដល់កន្លែងរួច ក៏បានយកនារីបម្រើផ្លូវភេទ២នាក់ទៅដេកក្នុងតំលៃ៥ម៉ឺនរៀល យកទៅដេកនៅផ្ទះសំណាក់ម្តុំបឹងកក់ក្បែរនឹងវិហារចាម ខណៈដែលជួលបន្ទប់បម្រុងនឹងគេងហើយ ប៉ុន្តែនារីរកស៊ីផ្លូវភេទ២នាក់នោះ បានអូសពេលធ្វើជាខ្ចីទូរស័ព្ទដៃរបស់គាត់ម៉ាក iPhone6 យកមកចុចលេង ភ្លាមៗនោះដែរគាត់ក៏ភ្លេចខ្លួនមួយភ្លេត ក៏ត្រូវជនសង្ស័យ២នាក់នោះយកទូរស័ព្ទដៃ ហើយរត់ចេញទៅបាត់ ដោយបក្ខពួកម្នាក់ទៀត ធ្វើជាអ្នករត់ម៉ូតូឌុបដឹកចេញទៅបាត់ ហើយគាត់ (ជនរងគ្រោះ) ក៏បានជិះម៉ូតូដេញតាមរកជនសង្ស័យ ទៅដល់ចំណុចផ្លូវទំនប់70 កែងផ្លូវរ៉ារថភ្លើង ក៏បានឃើញជនសង្ស័យកំពុងតែឈរនៅលើផ្លូវ ក៏ទៅប្តឹងសមត្ថកិច្ចប៉ុស្តិ៍ទួលសង្កែទី១ ឲ្យឃាត់ខ្លួនយកទៅប៉ុស្តិ៍ដើម្បីសួរនាំ។

នៅមុខសមត្ថកិច្ច ជនសង្ស័យបានសារភាពថា ខ្លួនពិតជាបានយកទូរស័ព្ទដៃ របស់ជនរងគ្រោះពិតប្រាកដមែន ប៉ុន្តែយកទៅបញ្ចាំបានលុយ១៥ម៉ឺនរៀលប៉ុណ្ណោះ។ ជនសង្ស័យ ត្រូវបានសមត្ថកិច្ចកសាងសំណុំរឿងបញ្ជូនទៅកាន់តុលាការ ដើម្បីចាត់ការទៅតាមផ្លូវច្បាប់ ៕