ស្វាយរៀងៈ កាលពីរសៀល ថ្ងៃទី២៦ ខែវិច្ឆិកា ឆ្នាំ២០១៨ ស្ថិតនៅចំណុចភូមិចំការកោះ ឃុំសម្បត្តិមាជ័យ ស្រុករមាសហែក ខេត្តស្វាយរៀង។ ជនសង្ស័យម្នាក់ មានឈ្មោះ ពេជ្រ អូន អាយុ២៤ឆ្នាំ មុខរបរបើករថយន្ដដឹកដី រស់នៅភូមិឈើទាល ឃុំដូង ស្រុក រមាសហែក។ ត្រូវបានសមត្ថកិច្ចនគរបាល រដ្ឋបាលសម្បត្ដិមានជ័យ ឃាត់ខ្លួនតាមពាក្យបណ្ដឹងរបស់ក្រុមគ្រួសារនារីរងគ្រោះ (មិនបង្ហាញ់ឈ្មោះ) អាយុ១៩ឆ្នាំ មុខរបរលក់គ្រឿងក្រអូប។ ពាក់ព័ន្ធនឹងករណីប៉ុនប៉ងរំលោភសេពសន្ធវៈ តែមិនបានសម្រេច។
នៅមុនកើតហេតុ ជនសង្ស័យឈ្មោះ ពេជ្រ អូន បានខលទូរស័ព្ទហៅរូបនាង ដែលមានមុខរបរលក់គ្រឿងក្រអូប ដើម្បីយកទឹកអប់មកលក់ឲ្យខ្លួន ដោយណាត់ជួបនៅវាលខាងកើត ភូមិចំការកោះ ពេលជួបគ្នា ខណៈនាងនិងជនសង្ស័យធ្លាប់ស្គាល់គ្នាពីមុនមកហើយ។
ជនសង្ស័យក៏បានទិញទឹកអប់១ដប ហើយបាននិយាយគ្នាលេងមួយសន្ទុះ ស្រាប់តែជនសង្ស័យបានធ្វើសកម្មភាពចាប់រូបនាងឱបថើប និងសម្រាតខោប៉ុនប៉ងរំលោភ ប៉ុន្ដែខណៈនោះក្រុមគ្រួសារបានមកទាន់ ក៏ចូលទៅជួយបង្កឲ្យជនសង្ស័យភ័យ ក៏រត់ឡើងជិះម៉ូតូចេញទៅកន្លែងការដ្ឋានរបស់ខ្លួន ក្នុងភូមិបិតទឹងវិញ ហើយឡើងបើករថយន្ដចេញ តែត្រូវបានប្អូនប្រុសរបស់នាង ឈ្មោះ សៅ សេងហួ អាយុ១៥ឆ្នាំ បានយកកាំបិតវាយទៅរថយន្តបណ្តាលឲ្យបែកកញ្ជក់ខាងឆ្វេង ទើបឈប់រួចប្ដឹងសមត្ថកិច្ចឃាត់ខ្លួនតែម្ដង។ ជនសង្ស័យត្រូវបានសមត្ថកិច្ចមូលដ្ឋានឃាត់ខ្លួន នៅប៉ុស្តិ៍នគរបាលរដ្ឋបាលសម្បត្ដិមានជ័យ ដើម្បីកសាងសំណុំរឿងតាមច្បាប់ ៕
