ភ្នំពេញៈ នៅថ្ងៃទី២៨ ខែវិច្ឆិកា ឆ្នាំ២០១៨នេះ បុរសជនជាតិអង់គ្លេសម្នាក់ មានឈ្មោះ LORYMAN STEPHEN JOHN ភេទប្រុស អាយុ៥៧ឆ្នាំ ត្រូវបាននគរបាល បញ្ជូនទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់ ពាក់ព័ន្ធករណីប្រព្រឹត្តអំពើទិញពេស្យាចារកុមារអាយុក្រោម១៥ឆ្នាំ។
បើតាមសម្ដីសមត្ថកិច្ចបានឲ្យដឹងថា មុនឈានដល់ការឃាត់ខ្លួន ជនបរទេសនេះ កាលពីថ្ងៃទី២៥ ខែវិច្ឆិកា ឆ្នាំ២០១៨ ជនសង្ស័យបាននាំក្មេងប្រុសចំនួន៤នាក់ ចូលទៅផ្ទះជួលរបស់ខ្លួន ដោយមានការសង្ស័យសមត្ថកិច្ចបានស្នើសុំត្រួតពិនិត្យផ្ទះជួលខាងលើ រកឃើញថា នៅក្នុងផ្ទះជនសង្ស័យមានកុមារាចំនួន៤នាក់ និងបាននាំមកនាយកដ្ឋាន ដើម្បីធ្វើការសាកសួរ។
ក្រោយការសាកសួរតាមការឆ្លើយបំភ្លឺរបស់កុមារារងគ្រោះ និងតាមការបំភ្លឺដើមបណ្តឹង ជាម្តាយកុមាររងគ្រោះ ព្រមទាំងការបំភ្លឺរបស់សាក្សី ជនសង្ស័យបានប្រើប្រាស់មធ្យោបាយជាច្រើន ដើម្បីទាក់ទាញកុមាររងគ្រោះ។ ក្នុងនោះសមត្ថិកច្ចបានដាក់ការសន្និដ្ឋានថា ជនសង្ស័យពិតជាបានប្រព្រឹត្តអំពើរួមភេទ និងរំលោភបំពានផ្លូវភេទលើកុមារ ដោយប្រើប្រាស់សម្ភារៈ ប្រាក់កាស ជាការអូសទាញ និងសម្រេចកសាងសំណុំរឿងបញ្ជូនជនសង្ស័យ និងវត្ថុតាងទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់ហើយ ៕