ហ្វេសបុកៈ កាលពីប៉ុន្មានថ្ងៃមុន បងប្រុសម្នាក់ ដែលមានគណនីហ្វេសបុកឈ្មោះ Sou Chheng បានធ្វើរឿងគួរឲ្យរំជួលចិត្តមួយ ដោយខណៈមានស្ត្រីពីរនាក់ ធ្វើដំណើរនៅតាមដងផ្លូវជាមួយនឹងទារកទើបនឹងកើតម្នាក់ ដោយដាក់ទារកនោះនៅចំកណ្ដាលម៉ូតូ ហើយអ្វីដែលលំបាកសំរាប់ពួកគាត់ គឺក្រោមកំដៅថ្ងៃផង ត្រូវភាយកំដៅចេញពីម៉ាស៊ីនរថយន្តផង ធ្វើឲ្យគាត់ពិបាកក្នុងការកាន់ទារក។ ស្របពេលមួយនោះ ពួកគាត់បានឈប់ចាំស្តុបទម្រាំដល់ពណ៌ប៉ៃតង ទើបចេញដំណើរ តែពេលកំពុងចាំ គាត់ក៏ស្ថិតនៅក្បែរនឹងរថយន្តមុខក្រោយ តែរថយន្តខាងក្រោយធ្វើឲ្យគាត់ទទួលកំដៅខ្លាំងជាងគេ ព្រោះក្បែរម៉ាស៊ីនរថយន្ត។
ស្រាប់តែបងប្រុសឈ្មោះ Sou Chheng ដែលជាម្ចាស់រថយន្ដខាងក្រោយ បានសរសេរថា "ខ្ញុំបានឃើញទារកទើបនឹងកើតម្នាក់ជិះម៉ូតូជាមួយម្តាយគេ ហើយចតនៅក្បែរឡានរបស់ខ្ញុំ ហើយខ្ញុំដឹងថា ម៉ាស៊ីនឡានរបស់ខ្ញុំមានកំដៅខ្លាំង។ ពេលនោះខ្ញុំបានពន្លត់ម៉ាស៊ីនឡានរបស់ខ្ញុំប្រហែលជា ៥០វិនាទី ដើម្បីរង់ចាំភ្លើងចរាចរពណ៌ប៉ៃតង ប្រហែលជាម្តាយរបស់ក្មេងដឹងថា ខ្ញុំពន្លត់ម៉ាស៊ីន គាត់ក៏បានងាកមកញញឹមដាក់ខ្ញុំ ហើយខ្ញុំក៏បានញញឹមទៅកាន់គាត់វិញ។ គ្រាន់តែពន្លត់ម៉ាស៊ីនរថយន្ត ខ្ញុំមានអារម្មណ៍ថា ខ្ញុំបានធ្វើរឿងល្អឲ្យនរណាម្នាក់អីចឹង។ ពេលខ្លះលុយមិនអាចឲ្យអ្នកបានសប្បាយចិត្តគ្រប់ពេលនោះទេ តែឥរិយាបទនៃការបើកបររបស់អ្នកអាចធ្វើឲ្យអ្នកសប្បាយចិត្តបាន" ៕