អ្នកដំណើរលើយន្តហោះ១៧៧នាក់ របស់ក្រុមហ៊ុន Frontier Airlines ក្នុងរដ្ឋណេវ៉ាដា សហរដ្ឋអាមេរិច ភិតភ័យនិងស្រែកទ្រហោយំគ្រប់ៗគ្នា ក្រោយពីឃើញស្លាបយន្តហោះ របើកចេញពីតួរ ក្នុងពេលហោះហើរ បានរយះពេល១៥នាទី

LAS VEGAS:(សហរដ្ឋអាមេរិច) យន្តហោះមួយគ្រឿងរបស់ក្រុមហ៊ុន Frontier Airlines បានចេញដំណើរពី ឡាសវែហ្គាស រដ្ឋណេវ៉ាដា ភាគខាងលិច ក្នុងទិសដៅទៅរដ្ឋផ្លរីដា រួចបានវិលត្រឡប់មកវិញ កាលពីថ្ងៃសុក្រទី30 ខែវិច្ឆិកា ក្នុងការហោះហើរត្រលប់មកវិញនេះដែរ ស្រាប់តែគម្របម៉ាស៊ីនរបស់យន្តហោះ បានរបូតចេញទាំងអស់ក្នុងអំឡុងពេលហោះហើរ ដែលធ្វើអោយអ្នកដំណើរមានការភិតភ័យយ៉ាងខ្លាំងនិងបានទ្រហោយំគ្រប់ៗគ្នា។ អ្នកដំណើរ CJ Gunnerson បានផ្ញើរូបថតនៃការខូចខាតដល់មិត្តរបស់គាត់ឈ្មោះ Brandon Rittiman ដែលជាអ្នកយកព័ត៌មានទូរទស្សន៍ ABC10 អន្តរជាតិ។ Rittiman បាននិយាយថា ការហោះហើរជាមួយមនុស្សចំនួនជាង 177 នាក់ នៅលើយន្តហោះត្រូវធ្វើការចុះចតជាបន្ទាន់នៅក្នុងទីក្រុងឡាសវេហ្គាស បន្ទាប់ពីមានហេតុការណ៏នេះបានកើតឡើង។ នេះបើតាមការចុះផ្សាយ របស់ Channel News Asia កាលពីថ្ងៃទី៣ ខែធ្នូ ឆ្នាំ២០១៨នេះ។

Brandon Rittiman បានបង្ហាញពីផ្គុំដែកពណ៌បៃតង ដែលត្រូវបានផ្ទុះនិងរបើកដោយផ្នែកនៃយន្តហោះ Airbus A320 ដោយបានបង្ហាញទាំងធ្នែកម៉ាស៊ីន ដែលត្រូវបានផ្ទុះខូច។ លោក Gunnerson បានរៀបរាប់ពីហេតុការណ៍នេះទៅនឹងទីភ្នាក់ងារព័ត៌មាន WTSP ក្នុងតំបន់ថា វាជាគ្រោះអាក្រក់ដែលកើតមានលើយន្តហោះនេះ ហើយបានធ្វើឲ្យអ្នកដំណើរទាំងអស់មានការភិតភ័យជាខ្លាំងហើយបានស្រែកទ្រហោយំគ្រប់ៗគ្នាក្នុងហេតុការណ៏មួយនេះ។

អ្នកដំណើរម្នាក់ទៀតឈ្មោះ Stella Ponce បានប្រាប់សារព័ត៌មានថា នាងបានផ្ញើរសារទៅឱ្យកូនស្រីរបស់នាងនិយាយថានាងស្រឡាញ់កូនស្រីរបស់នាងខ្លាំងណាស់ នាងបានគិតថាប្រហែលជាមិនបានជូបកូនស្រី និងមនុស្សជាទីស្រលាញ់របស់នាងរហូតហើយ។ អ្នកស្រីបានបន្ថែមថា មនុស្សគ្រប់គ្នាកំពុងស្រែកឱ្យអ្នកបើកបរបយន្តហោះបញ្ឈប់ហើយស្ត្រីពីរនាក់កំពុងយំ ខណៈដែលអ្នកដំណើរផ្សេងទៀត កំពុងចង្អុលបង្ហាញពីបង្អួចនៃព្រឹត្តិការណ៏ដែលបានកើតឡើង។

យោងតាមគេហទំព័រហោះហើរ FlightAware ជើងហោះហើរ Frontier 260 បានចេញដំណើរទៅកាន់រដ្ឋធានី Tampa នៅវេលាម៉ោង7:12នាទីព្រឹក ហើយបានវិលត្រឡប់ទៅអាកាសយានដ្ឋានអន្តរជាតិ McCarran នៃក្រុងឡាសវេហ្គាសនៅវេលាម៉ោង7:27 នាទីព្រឹក។

របាយការណ៍មួយរបស់ USA Today បានដកស្រង់សម្តីរបស់អ្នកនាំពាក្យក្រុមហ៊ុនអាកាសចរណ៍មួយដែលនិយាយថា ផ្នែកមួយនៃគម្របម៉ាស៊ីនដែលហៅថា (បាលុងឬក៏ខ្ចៅ) បានរលុងនិងបំបែកចេញពីយន្ដហោះបណ្តាលឲ្យផ្ទុះខូចតែម្តង។

គួរបញ្ជាក់ថាអ្នកដំណើរទាំងអស់ត្រូវបានគេផ្តល់សំណងនិងប័ណ្ណបញ្ចុះតម្លៃ 500 ដុល្លារសម្រាប់ការហោះហើរនៅពេលក្រោយ។ ក្រុមហ៊ុនអាកាសចរណ៍នេះក៏បានរៀបចំឱ្យអ្នកដំណើរធ្វើដំណើរតាមក្រុមហ៊ុនអាកាសចរណ៍ដទៃទៀត ដើម្បីធានាថា ពួកគេនឹងទៅដល់រដ្ឋផ្លរីដា ឱ្យបានឆាប់តាមដែលអាចធ្វើទៅបាន។

អ្នកដំណើរ 177 នាក់ អ្នកបើកយន្តហោះ ព្រមទាំងបុគ្គលិកបម្រើលើយន្តហោះ6នាក់ទៀត ត្រូវបានរាយការណ៍ថាមានសុវត្ថិភាពវិញហើយ។