ភ្នំពេញ៖ សាខាកក្រករាជធានីភ្នំពេញ៖ នាល្ងាចថ្ងៃទី ០៣ ខែ ធ្នូ ឆ្នាំ ២០១៨ ក្រុមការងារសាខាកាកបាទក្រហមកម្ពុជា រាជធានីភ្នំពេញ ដឹកនាំដោយ លោកវេជ្ជបណ្ឌិត ងី មានហេង អនុប្រធានគណៈកម្មាធិការសាខា បានចុះសាកសួរសុខទុក្ខលោកអនុសេនីយ៍ទោ ម៉ៅ សំណាង អាយុ៥០ឆ្នាំ ជាមន្ត្រីនគរបាលនៅអធិការដ្ឋាននគរបាលខណ្ឌចំការមន ដែលបានរងគ្រោះដោយសារជនជាតិចិនបែកថ្នាំកាប់បណ្តាលឲ្យរយះដៃ ខណៈទៅជួយស្ត្រីលក់ទឹកអំពៅម្នាក់ កាលពីថ្ងៃសៅរ៍ ទី១ ខែធ្នូ ឆ្នាំ២០១៨ ស្ថិតផ្លូវ៤៣២ កែង៩៥ ខណ្ឌចំការមន ដែលសព្វថ្ងៃលោកកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ។
នាឱកាសនោះ លោកវេជ្ជ.អនុប្រធានគណៈកម្មាធិការសាខា បានពាំនាំនូវការផ្តាំផ្ញើសាកសួរសុខទុក្ខពី ឯកឧត្តម មាន ចាន់យ៉ាដា ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ និងជាពិសេសពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់លោកអនុសេនីយ៍ទោ ម៉ៅ សំណាង ព្រមទាំងលើកទឹកចិត្តសូមឲ្យស្តាប់តាមការណែនាំរបស់គ្រូពេទ្យ ពិសារថ្នាំអោយបានទៀងទាត់ដើម្បីឆាប់ជាសះស្បើយ ។ ជាមួយគ្នានោះ ក្រុមការងារសាខាក៏បាននាំយកអំណោយមនុស្សធម៌មកផ្តល់ជូនលោកអនុសេនីយ៍ទោ ម៉ៅ សំណាង រួមមាន៖ ទឹកក្រូច១កេស ស្ករស១គីឡូក្រាម មី១កេស ទឹកដោះគោ៥កំប៉ុង តែ៥កញ្ចប់ ត្រីខ១យួរ និងថវិកាចំនួន៦សែនរៀល ។ លោកវេជ្ជបណ្ឌិត ងី មានហេង ក៏បានជួយឧបត្ថម្ភថវិកាបន្ថែមចំនួន២សែនរៀលផងដែរ ៕
