ភ្នំពេញៈ កាលពីថ្ងៃទី៣ ខែធ្នូ ឆ្នាំ២០១៨ លោកគ្រូស្នេហ៍មន្តអាគមអូមអាមម្នាក់ មានឈ្មោះ ណុប សក្កដា ហៅ (គ្រូផេះគ្រូអង្កាម) ភេទប្រុស អាយុ៥០ឆ្នាំ រស់នៅផ្លូវលេខជាតិ៥ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ។ ត្រូវបានលោកអធិការរងខណ្ឌឫស្សីកែវ លោក លឹម សេរីសោភ័ណ្ឌ ប្តឹងទាមទារជំងឺចិត្ត នូវទឹកប្រាក់ចំនួន២ម៉ឺនដុល្លារ បន្ទាប់ពីគ្រូម្នាក់នេះ បង្ហោះឡាយវីដេអូបរិហារកេរ្តិ៍ នៅតាមបណ្តាញសង្គម ដែលធ្វើឱ្យប៉ះពាល់ដល់កិត្តិយសសេចក្តីថ្នូរ របស់លោក កាលពីព្រឹក ថ្ងៃទី៣ ខែធ្នូ ឆ្នាំ២០១៨។
នៅក្នុងពាក្យបណ្តឹង បានរៀបរាប់ទៀតថា កាលពីវេលាម៉ោង៩ព្រឹក ថ្ងៃទី៣ ខែធ្នូ ឆ្នាំ២០១៨ បងថ្ងៃរបស់គាត់ មានឈ្មោះ ឈឹម ផារិទ្ធ ភេទប្រុស អាយុ៤៨ឆ្នាំ បានដុតកន្ទុយសំបុត្រ ផ្ញើម៉ូតូ និងចុងសន្លឹក ចោលនៅមុខផ្ទះរបស់គាត់ ដើម្បីជៀសវាងគេលួចយកទៅប្រើប្រាស់ ក្នុងអំពើទុច្ចរិតណាមួយ ជាយថាហេតុ ខណៈនោះស្រាប់តែលោកគ្រូស្នេហ៍អូមអាមនោះ បញ្ជាកូនចៅមកពន្លត់ភ្លើង ដែលបងថ្លៃប្រុសកំពុងដុត ដោយពុំបានសួរនាំអ្វីទាំងអស់ ហើយថែមទាំង យកសំណល់កន្ទុយសំបុត្រ ដែលមិនទាន់ឆេះអស់ ទៅទុកក្នុងផ្ទះរបស់ខ្លួន។ បើទោះបីជា បងថ្លៃរបស់គាត់ទៅសុំវិញ យ៉ាងណាក៏មិនអោយវិញដែរ។
មិនតែប៉ុណ្ណោះ លោកគ្រូស្នេហ៍អូមអាមនោះ បានឡាយវីដេអូ បង្ហោះនៅលើបណ្តាញសង្គមហ្វេសបុក បរិហាកេរ្តិ៍ជាសាធារណៈ ដែលធ្វើឱ្យប៉ះពាល់ដល់កិត្តិយស សេចក្តីថ្លៃថ្នូររបស់គាត់យ៉ាងខ្លាំង ដោយមិនអាចអត់អោនឱ្យបានឡើយ ទើបលោកអធិការរង ប្តឹងទាមទារសំណងជំងឺចិត្ត នូវទឹកប្រាក់ចំនួន២ម៉ឺនដុល្លារសហរដ្ឋអាមេរិក។
បើតាម លោកអធិការរង លឹម សេរីសោភ័ណ្ឌ បានប្រាប់ថា បងថ្លៃរបស់គាត់ជាអ្នករកស៊ីផ្ញើម៉ូតូ នៅស្ថានីយ៍ទូរទស្សន៍ CTN ហើយកន្ទុយសំបុត្រ ឬចុងសន្លឹកដែលនៅសល់ គឺយកមកផ្ទះ ហើយដុតបំផ្លាញចោលរាល់មួយអាទិត្យម្តងៗ ដើម្បីជៀសវាងក្រែងជនខិលលួច យកកន្ទុយសំបុត្រ ឬចុងសន្លឹកផ្ញើម៉ូតូនោះទៅក្នុងបំណងមិនល្អណាមួយជាយថាហេតុ។
ប្រភពពីអ្នករស់នៅក្បែរខាង បាននិយាយប្រាប់អ្នកយកព័ត៌មានអោយដឹងថា ក្នុងរយៈពេលប៉ុន្មានខែចុងក្រោយនេះ ផ្ទះគ្រូស្នេហ៍នោះ មិនមានភ្ញៀវចូលអ៊ូអរ ដូចមុនៗទៀតទេ។ ហើយការដុតក្រដាស កន្ទុយសំបុត្រនោះ ញឹកញាប់ ប្រហែលជាគ្រូស្នេហ៍នោះ សង្ស័យថា ការដុតកន្ទុយសំបុត្រ នោះមានដាក់មន្តអាគមអ្វីហើយមើលទៅ ដែលធ្វើឱ្យភ្ញៀវគ្រូស្នេហ៍នោះលែងចូល ទើបគ្រូស្នេហ៍ទៅពន្លត់ភ្លើង ហើយរើកកាយរកមើលក្រែងមានវត្ថុណាមួយ ប៉ុន្តែរកមិនឃើញ ។
ពាក់ពន្ធ័នឹងបញ្ហានោះ ភ្នាក់ងារសារព័ត៌មានយើង បានជួបគ្រូស្នេហ៍មន្តអាគមតាមទូរសព្ទ័ កាលពីព្រឹកថ្ងៃទី៤ ខែធ្នូ ដោយលោកគ្រូផេះគ្រូអង្គាម គាត់ច្រានចោលការចោទប្រកាន់របស់លោកអធិការរង រួចថែមទាំងគំរាមថា នឹងជួបថ្នាក់លើ ហើយដកតំណែងអធិការរង ក្រវាត់ចោលទៀតផង ៕
