កំពង់ឆ្នាំងៈ កាលពីវេលាម៉ោង២១ៈ២៩នាទី ថ្ងៃទី១០ ខែធ្នូ ឆ្នាំ២០១៨ ស្ថិតនៅចំណុចភូមិដំរីកូន ឃុំអញ្ចាញរូង ស្រុកបរិបូរណ៍ ខេត្ដកំពង់ឆ្នាំង។ មានសេចក្តីរាយការណ៍ពីស្រុកបរិបូរណ៍បានឱ្យដឹងថា មានករណីប្លន់ប្រដាប់អាវុធមួយបានកើតឡើង ដោយជនសង្ស័យមានគ្នា៣នាក់ ប្រដាប់ដោយអាវុធខ្លី១ដើម ជិះរថយន្ដ១គ្រឿង បានចូលប្លន់ផ្ទះឈ្មោះ ស៊ុយ គឹម ភេទប្រុស អាយុ៥២ឆ្នាំ។
រួចបានបាញ់ចំនួន៥គ្រាប់ ត្រូវជនរងគ្រោះម្នាក់ ត្រង់ភ្លៅមានឈ្មោះ វ៉ាត់ សុខសាន អាយុ២៧ឆ្នាំ រស់នៅក្នុងភូមិឃុំខាងលើ ជាប្រជាការពារពេលទៅជួយម្ចាស់ផ្ទះ។ សេចក្តីរាយការណ៍បានបញ្ជាក់ថា ម្ចាស់ផ្ទះមានគោបា ធ្វើពីសំរិទ្ធ។ ប៉ុន្តែពួកវាប្លន់យកមិនបាននោះទេ យកបានតែលុយចំនួន៥ម៉ឺនរៀល និងទូរស័ព្ទដៃតែប៉ុណ្ណោះ។ ក្រោយពីធ្វើសកម្មភាពរួច ជនសង្ស័យបានគេចខ្លួនបាត់ចំណែកជនរងគ្រោះ ត្រូវគេបញ្ជូនមកព្យាបាលនៅមន្ទីរពេទ្យខេត្ដកំពង់ឆ្នាំង ៕