ភ្នំពេញៈ៖ កំណើនហាងម៉ាស្សាកោសជប់តម្លៃ១០,០០០រៀល បានដុះរីកឡើងដូចផ្សិតនៅក្នុងសង្កាត់ស្រះចក ចាប់ពីតំបត់រម្មណីយដ្ឋានវត្តភ្នំរហូតដល់គោលស្ពានជ្រោយចង្វា ដែលស្ថិតនៅក្នុងខណ្ឌដូនពេញ សេវាកម្មម៉ាស្សាកោសជប់នេះកំពុងតែត្រូវចិត្តពីសំណាក់ក្រុមអ្នកដើរលេងយប់និងមានបង្កប់សេវាផ្លូវភេទថែមទៀតផង។
មិនដឹងថា តើហាងម៉ាស្សាកោស ជប់ណាមួយ មានបង្កប់នូវសេវាបម្រើផ្លូវភេទ ឬអត់នោះឡើយ។ ប៉ុន្តែអ្វីដែលជាបញ្ហា ដែលបានកើតឡើងក្នុងពេលកន្លងមកជាបន្តបន្ទាប់នោះ គឺហាងទាំងនោះតែងតែបន្លំលួចលុយភ្ញៀវជាញឹកញាប់ហើយមានភ្ញៀវជាច្រើននាក់មកហើយ ដែលបានរងគ្រោះព្រោះការលួចលុយ ពេលចូលទៅដល់ទីនោះ។
គេសង្កេតឃើញថា ចាប់ពីរសៀលឡើងទៅ មានពន្លឺភ្លើងនៃស្លាកយីហោ "កោសជប់ម៉ាស្សា តម្លៃ១០.០០០រៀល" បានភ្លឺព្រោងព្រាតចាប់ពីគល់ស្ពានម្តុំវត្តភ្នំ រហូតដល់គល់ស្ពានជ្រោយចង្វាព្រំប្រទល់ខណ្ឌឬស្សីកែវ។ ដោយឡែកក្រុមអ្នកដើរលេងយប់ និងអ្នកស្វែងរកសេវាកោសជប់និងម៉ាស្សាក៏មានជាហូរហែនៅតាមហាងម៉ាស្សាកោសជប់ទាំងនោះនិងមានអ្នកខ្លះក៏បានស្វែងរកសេវាផ្លូវភេទនៅទីនោះផងដែរ។
ប៉ុន្តែទោះជាយ៉ាងណា អ្នករកស៊ីបើកហាង "ម៉ាស្សាកោសជប់តម្លៃ១០,០០០រៀល" ទាំងនោះ ក៏មិនមែនសុទ្ធតែអាក្រក់ទាំងអស់នោះដែរ ។ តែក៏មានមួយ ចំនួនធំផងដែរដែលរកស៊ីតាមទុច្ចរិត ពួកគេបានរៀបចំសេណារីយោ ត្រូវដងត្រូវផ្លែគ្នារវាងថៅកែហាង ជាមួយស្ត្រីដែលជាបុគ្គលិកបម្រើការងារនៅក្នុងនោះក្នុងការលួចលុយភ្ញៀវឬក៏បន្លំយកលុយសែនដូរយកលុយពិតប្រាកដរបស់ភ្ញៀវជាហូរហែ។
ដូច្នេះអាជ្ញាធរនិងសមត្ថកិច្ចមូលដ្ឋានគួរតែមានចំណាត់ការទៅលើក្រុមអ្នករកស៊ីបែបទុច្ចរិតនោះផង ដើម្បីសុវត្ថិភាពរបស់អ្នកដែលចូលទៅកាសជប់ម៉ាស្សានៅទីនោះហើយដើម្បីទប់ស្កាត់កុំឲ្យមានបញ្ហាខាងលើកើតឡើងនោះ។ អាជ្ញាធរគួរតែហៅម្ចាស់ហាងទាំងនោះឲ្យធ្វើកិច្ចសន្យារកស៊ីឲ្យបានត្រឹមត្រូវនិងទទួលខុសត្រូវនៅពេលមានរឿងខាងលើកើតឡើង។ មិនតែប៉ុណ្ណោះប្រសិនបើមានរឿងលួចលុយភ្ញៀវកើតឡើង ឬមានការបម្រើសេវាផ្លូវភេទនៅក្នុងនោះ គួរតែធ្វើការចាប់ខ្លួនពួកគេ ចាត់ការទៅតាមផ្លូវច្បាប់ ដោយគ្មានការ យោគយល់ឬលើកលែងឡើយ។
ដោយឡែកអ្នកដែលចូលចិត្ត ចូលទៅកាន់កន្លែងទាំងនេះ គួរតែមានការប្រុងប្រយ័ត្នខ្ពស់ ចំពោះទ្រព្យសម្បត្តិ របស់ខ្លួនដូចជាម៉ូតូជាដើម ព្រោះនៅក្នុងហាងទាំងនោះគ្មានសន្តិសុខយាមទេ ហើយកុំពឹងក្រុមនារីកោសជប់ ស្រួលមិនស្រួលអាចស៊ីដាច់ម៉ូតូបាត់ទៀត។
មួយទៀតកាបូបលុយឬគ្រឿងអលង្ការផ្សេងៗព្រោះក្រុមអ្នករកស៊ីកោសជប់ម៉ាស្សាទាំងនោះគឺជាក្រុមដៃស្អិតតែងតែយកលុយក្លែងក្លាយទៅប្តូរយកលុយភ្ញៀវ ដល់ពេលដឹងថាបាត់ មិនដែលយកបានមកវិញទេ មានតែការខូចតែឈ្មោះនិងខ្មាសគេប៉ុណ្ណោះ ដូច្នេះកុំប្រហែសឱ្យសោះ។
តាមការបង្ហើបពីប្រជាពលរដ្ឋបានឱ្យដឹងថា ទីតាំងខាងលើទាំងនេះបានធ្វើរកស៊ីបែបនេះជាយូរមក ហើយៗទីតាំងខ្លះក៏ធ្លាប់ត្រូវបានអាជ្ញាធរពាក់ព័ន្ធចុះបង្រ្កាបខ្លះដែរ តែមួយរយៈក្រោយមកក៏បើកដំណើរការធម្មតាវិញ ទោះបីសមត្ថកិច្ចបានហៅមកព្រមាន និងធ្វើ កិច្ចសន្យា ឱ្យបញ្ឈប់ការបន្លំលុយភ្ញៀវម្តងក៏ដោយ។
ជារឿយៗម្ចាស់ហាងទាំងនោះនៅតែបន្ដការបន្លំលុយភ្ញៀវដដែល ទោះបីជាមានភ្ញៀវមកប្តឹងសមត្ថកិច្ចជាញឹកញាប់ក៏ដោយ តែបានមកវិញបានត្រឹមតែភាពអាម៉ាស់ប៉ុណ្ណោះ៕
ដោយៈ ភារ៉ា
