ភ្នំពេញៈ កាលពីថ្ងៃទី៩ ខែឧសភា ឆ្នាំ២០១៩ ស្ថិតនៅចំណុច ទីប្រជុំជន ផ្លូវវេងស្រេង សង្កាត់ចោមចៅទី១ ខណ្ឌពោធិ៍សែនជ័យ។ មានហេតុការណ៍ភ្ញាក់ផ្អើ​លមួយ ដែលបង្កឡើងដោយ មុខសញ្ញាឆក់២នាក់ ទើបចេញពីគុក មានឈ្មោះ បឿន រ៉ាម៉ន ភេទប្រុស អាយុ១៧ឆ្នាំ មុខរបរមិនពិតប្រាកដ។ និងឈ្មោះ ហាន ហាច ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅមិនពិតប្រាកដ (មានសារធាតុញៀន)។ 

មិនព្រមរកការងារធ្វើ​ទេ បែរជាមិនរាងចាល ប្រព្រឹត្តិអំពើ​សង្គមស្អប់ខ្ពើ​ម ចេញឆក់កាបូបស្ត្រីម្នាក់ មានឈ្មោះ ជា លីម ភេទស្រី អាយុ៣៨ឆ្នាំ មុខរបរកម្មកររោងចក្រ ស្នាក់នៅបន្ទប់ជួល ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។ កំពុងជិះម៉ូតូមកពីលេងផ្ទះបងប្អូន នៅម្តុំលូ៥ ត្រឡប់ទៅផ្ទះជួលភូមិទួលពង្រ តែនាងស្រែកឆោឡោ ផ្អើ​លកម្លាំងនគរបាលប៉ុស្តិ៍ចោមចៅទី១ ប្រដេញតាមចាប់ឃាត់ខ្លួនបានទាំង២នាក់។

មធ្យោបាយជិះធ្វើសកម្មភាព ម៉ូតូម៉ាកហុងដា ឌ្រីមសង់ សេ១២៥ ពណ៌ខ្មៅ ពាក់ស្លាកលេខ ១GL-4838 ជារបស់ជនសង្ស័យ។ ចំពោះទ្រព្យសម្បត្តិ ក្នុងកាបូបជនរងគ្រោះ មានប្រាក់ដុល្លារ១៥៣ដុល្លារ, ប្រាក់រៀល ៣០,០០០រៀល ,ទូរស័ព្ទដៃម៉ាក Techno មួយគ្រឿង និងកាបូបដៃក្រហម១ បានដកហូតពីជនសង្ស័យ និងបានប្រគល់ឲ្យជនរងគ្រោះវិញផងដែរ។ 

ជនសង្ស័យទាំងពីរនាក់ ត្រូវបានកម្លាំងនគរបាលប៉ុស្តិ៍ចោមចៅទី១ ប្រគល់ឲ្យផ្នែកជំនាញ នៃអធិការដ្ឋាននគរបាលខណ្ឌពោធិ៍សែនជ័យ ដើម្បីសាកសួរបន្តតាមជំនាញ និងឃុំខ្លួនជាបណ្តោះអាសន្ន រងចាំចាត់ការតាមនីតិវិធី ៕