សូមប្រុងប្រយ័ត្នផង! នៅពាក់កណ្ដាលឆ្នាំ២០១៩នេះ ចាប់ពីដើមខែឧសភា រហូតដល់ខែមិថុនា ជំងឺគ្រុនឈាម កំពុងវាយប្រហារមកលើកុមារ និងមនុស្សចាស់ ជិត៥០០នាក់ហើយ ក្នុងខេត្តមណ្ឌលគីរី

ខេត្តមណ្ឌលគិរីៈ កាលពីពេលថ្មីៗនេះ នៅពាក់កណ្ដាលឆ្នាំ២០១៩នេះ ចាប់ពីដើមខែឧសភា រហូតដល់ពាក់កណ្ដាលខែមិថុនា មានរយៈពេលជាង១ខែមកហើយ និងមានមនុស្សក្មេងចាស់ប្រមាណ៥០០នាក់ បានកើតជំងឺគ្រុនឈាមមកសម្រាកព្យាបាលនៅមន្ទីរពេទ្យ ក្នុងនោះបានជាសះស្បើយជាបន្តបន្ទាប់ចំនួន៤៤៦នាក់។ ហើយមនុស្ស៤នាក់ មានអាការធ្ងន់បញ្ជូនទៅមន្ទីរពេទ្យនៅរាជធានីភ្នំពេញ កំពុងសម្រាកព្យាបាល ក្នុងមន្ទីរពេទ្យបង្អែកប្រមាណ៥០នាក់។

លោកវេជ្ជបណ្ឌិត ទុយ ស្រស់ ប្រធានមន្ទីរពេទ្យបង្អែកខេត្តថ្លែងថា ប៉ុន្មានឆ្នាំមកនេះនៅ ខេត្តមណ្ឌលគិរី ធ្លាប់ផ្ទុះឡើងនូវជំងឺគ្រុនឈាមម្ដងរួចមកហើយ នៅឆ្នាំ២០១៦ ចំណែកឆ្នាំ២០១៧-២០១៨ អត្រាអ្នកជម្ងឺគ្រុនឈាមមានតិចតួចប៉ុណ្ណោះ។ ប៉ុន្តែជំងឺគ្រុនឈាមបានផ្ទុះឡើងម្ដងទៀត នៅពាក់កណ្ដាលឆ្នាំ២០១៩នេះ។

លោកវេជ្ជបណ្ឌិត ប៊ុន សួ ប្រធានមន្ទីរសុខាភិបាលខេត្ត បានឲ្យដឹងដែរថា មន្ត្រីសុខាភិបាលបានចុះដាក់ថ្នាំសម្លាប់ដង្កូវទឹកតាមផ្ទះប្រជាពលរដ្ឋគ្រប់តំបន់ និងណែនាំអំពីវិធានការបង្ការផងដែរ។ លោកក៏សូមអំពាវនាវដល់ប្រជាពលរដ្ឋ ត្រូវសម្អាតបរិស្ថានជុំវិញផ្ទះកុំឲ្យមានរបស់ដក់ទឹក ដែលជាជម្រករបស់សត្វមូស និងត្រូវមកមន្ទីរពេទ្យបង្អែកជួបជាមួយគ្រូពេទ្យ ករណីសង្ស័យថា មានជំងឺគ្រុនឈាម ព្រោះនៅមន្ទីរពេទ្យបង្អែកខេត្ត មានលទ្ធភាពគ្រប់គ្រាន់ក្នុងការព្យាបាលអ្នកជំងឺគ្រុនឈាម ដោយមានទាំងធនធានមនុស្ស បច្ចេកទេសធ្វើរោគវិនិច្ឆ័យច្បាស់លាស់ និងមានថ្នាំច្រើនប្រភេទសម្រាប់ប្រើប្រាស់ ជៀសវាងការព្យាបាលនៅខាងក្រៅ ធ្វើរោគវិនិច្ឆ័យមិនត្រឹមត្រូវ ផ្ដល់ថ្នាំខុស អាចប៉ះពាល់ដល់អាយុជីវិត ឬអាចចំណាយថវិកាអស់ច្រើន តែមិនជាសះស្បើយ ៕