ភ្នំពេញ ៖ រឿងនេះមិនខុសពីរឿងមុនៗនោះទេ ដែលដាក់លុយបានលុយមកវិញ ក្នុងអត្រាការប្រាក់ខ្ពស់ ស្រាប់តែពេលនេះលិចឭដំណឹងថា សមត្ថកិច្ចចម្រុះបានចុះចាប់ខ្លួនអ្នកជំនួញដីឡូតិ៍ដ៏ល្បីម្ចាស់ម្នាក់ ក្រុមហ៊ុន Enarita លោក ឌីម សួនណាត ពីបទឆបោក និងចេញសែកស្អុយរាប់រយលានដុល្លារ។
ក្នុងនោះដែរ តាមប្រភពរបស់ជនរងគ្រោះបានឱ្យដឹងថា លោក ឌីម សួនណាត ដែលជាអគ្គនាយកក្រុមហ៊ុនអចលនាទ្រព្យ ក្រុមហ៊ុន អុីណារីតា ឌីវេឡុបមុិន ឯ.ក (ENARITA DEVELOPMENT CO.,LTD.) បានភូតភរ និងឆរបោកជាច្រើនលើក ហើយបានចេញសែកសងលុយ ប៉ុន្តែគ្មានលុយដល់ជនរងគ្រោះជាច្រើននាក់ដែលមានទឹកប្រាក់សរុបយ៉ាងច្រើនសន្ធឹកប្រមាណ២០០ជិត៣០០លានដុល្លារ។
តាមសំដីផ្ទាល់របស់ជនរងគ្រោះជាច្រើននាក់បានប្រាប់ថា គាត់បានវិនិយោគ ជាមួយ លោក ឌីម សួនណាត ដែលជាអគ្គនាយកក្រុមហ៊ុន ENARITA development Co.,LTDដែលក្នុងកុងត្រានោះមានធានាសែក និងស្នាមផ្តិតមេដៃរបស់ លោកឌីម សួនណាត់ ផ្ទាល់ដែលជាហេតុធ្វើអោយគាត់ទុកចិត្តរហូតមកដល់ថ្ងៃទី១៣ ខែឧសភា ឆ្នាំ២០១៩ ក៏មានការដកប្រាក់តាមសែកមិនបាន ហើយលោកឌីម សួនណាត បានលួងលោមដល់ជនរងគ្រោះថា ធនាគារជាតិធ្វើការបង្កក់លុយគាត់ ហើយធ្វើការស៉ើបអង្កេតដោយសារចរន្តលុយច្រើនពេក ហើយបង្គាប់ជនរងគ្រោះអោយទៅដកនៅក្រុមហ៊ុនលោកផ្ទាល់វិញ។
ហើយលោកបានពន្យាពេលរហូតដល់ថ្ងៃទី៥ ខែកក្កដា ឆ្នាំ២០១៩ ហើយនៅតែមិនឃើញក៏មានពាក្យបណ្តឹងរបស់ជនរងគ្រោះចូលទៅក្រសួងមហាផ្ទៃ ប្តឹងពីបទល្មើសជាក់ស្តែងទៅលោក ឌីម សួនណាត ហើយធ្វើការស៉ើបអង្កេតជាក់ស្តែង។
របាយការណ៍ បង្ហាញថា លោកឌីម សួនណាត មិនត្រូវធនាគារណាបង្កក់លុយលោកឡើយគឺ លោកមានចេតនា បិទគណនេយ្យធនាគារខ្លួនឯង និងធ្វើការពន្យាពេលរាល់កិច្ចសន្យារបស់ជនរងគ្រោះ។
ទាក់ទងនឹងដំណឹង នៃការចោទប្រកាន់ខាងលើនេះ សារព័ត៍មាន ខ្មែរញូ៉វ មិនអាចស្វែងរកការបកស្រាយពីសំណាក់ លោក ឌឹម សួនណាត និងម្ចាស់ក្រុមហ៊ុន Enaritaបាននៅឡើយទេ។
ក្រុមហ៊ុន Enarita ត្រូវបានមហាជនដឹងថា កាលពីកន្លងមកធ្លាប់បានប្រកាសពីគម្រោងលក់ដីរបស់ខ្លួននៅក្នុងតំបន់លំហែកាយជាច្រើនគម្រោងនៅក្នុងខេត្តសៀមរាប បាត់ដំបង ប៉ៃលិន និងព្រះវិហារជាដើម។ ប៉ុន្តែ ពេលនេះ ស្រាប់តែធ្លាយដំណឹង នៃការចោទប្រកាន់ថាបានឆបោកអតិថិជនរបស់ខ្លួនទៅវិញ៕