កាលពីថ្ងៃទី១២ ខែធ្នូ ឆ្នាំ២០១៩ លោកថេង សុថុល អភិបាល នៃគណៈអភិបាលខណ្ឌចំការមន កម្លាំងគណៈបញ្ជាការឯកភាពខណ្ឌចំការមន ដឹកនាំដោយ លោក កែវ សំណាង អភិបាលរង នៃគណៈអភិបាលខណ្ឌចំការមន បានចុះត្រួតពិនិត្យទីតាំងអាជីវកម្មមជ្ឈមណ្ឌលកំសាន្តសំរាប់កុមារ ហ្គេម វេីលដ៏ ដែលស្ថិតនៅក្រោយស្ថានទូតអូស្ត្រាលី ផ្លូវលេខ ៧៨ ភូមិ ១៤ សង្កាត់ ទន្លេបាសាក់ ខណ្ឌចំការមន រាជធានីភ្នំពេញ។
ក្រោយពីបានត្រួតពិនិត្យរួចមក ក្រុមការងារឃេីញថាមានទូរហ្គេមបាញ់ត្រីចំនួន ០៨ គ្រឿង ដែលដាក់បង្កប់នៅក្នុងមជ្ឈមណ្ឌលកំសាន្ដនេះ ដូចនេះក្រុមការងារបានសម្រេចដកហូតទូរហ្គេមទាំងអស់នេះមករក្សាទុកនៅសាលាខណ្ឌចំការមន និងបាននាំអ្នកពាក់ព័ន្ធចំនួន ១១នាក់ ដើម្បីមកសាកសួរព័ត៌មានបន្ថែមនៅសាលាខណ្ឌចំការមន។ ចំពោះបញ្ហាពាក់ព័ន្ធល្បែងស៊ីសងខុសច្បាប់គ្រប់ប្រភេទក្នុងមូលដ្ឋានខណ្ឌចំការមន លោកអភិបាលខណ្ឌ នឹងចាត់វិធានការចុះបង្រ្កាបបន្តបន្ទាប់ទៀត។
ប្រភព៖រដ្ឋបាលខណ្ឌចំការមន