វីវហើយ! ដោយសារតែភ្ញៀវទេសចរណ៍ថយចុះ សណ្ឋាគារអប្សរាអង្គរ និងសារមន្ទីរអង្គរ ប្រកាសបិទទ្វារជាបន្ទាន់ ខណៈដែលសណ្ឋាគារដ៏ល្បីមួយនៅភ្នំពេញបានបិទទ្វារួចរាល់...

សៀមរាប៖ ពលរដ្ឋរស់នៅក្រុងសៀមរាប និងក្រុមមគ្គទេសក៍ទេសចរបង្ហាញក្ដីកង្វល់យ៉ាងខ្លាំង ពីការធ្លាក់ចុះភ្ញៀវទេសចរយ៉ាងគំហុកពុំធ្លាប់មាន បណ្ដាលឱ្យម្ចាស់សណ្ឋាគារ ផ្ទះសំណាក់ និងកន្លែងផ្ដល់សេវាកម្មទេសចរមួយចំនួនបង្ខំចិត្តបិទទ្វារ។ ក្នុងនោះដែរ សណ្ឋាគារអប្សរាអង្គរ ដែលជាសណ្ឋាគារលំដាប់ផ្កាយ៤មួយ បានប្រកាសផ្អាកដំណើរដោយគ្មានពេលកំណត់ ក្រោយពេលសណ្ឋាគារនេះ បានបើកដំណើរការអស់រយៈពេលជិត២០ឆ្នាំមកហើយ។

យោងតាមគណនីហ្វេសប៊ុករបស់ឈ្មោះ Teviphea Nuon បានបង្ហោះរូបថតជាច្រើន និងសារ អមដោយសារក្តុកក្តួលថា សណ្ឋាគារអប្សរាអង្គរ បានបើកដំណើរការអស់រយៈពេលជិត ១៨ឆ្នាំមកហើយ។ សណ្ឋាគារនេះ ធ្លាប់មានមោទនភាពក្នុងការលើកស្ទួយវិស័យទេសចរណ៍អោយមានកំណើន និងធ្លាប់បានទទួលរៀបចំកិច្ចប្រជុំធំៗ។ លើសពីនេះ សណ្ឋាគារអប្សរាអង្គរ ក៏ធ្លាប់ទទួលពានរង្វាន់ ASEAN Green Hotel Standard ពីរដង និង ជាសណ្ឋាគារឆ្នើមមួយទទួលបានពានរង្វាន់ ជាសណ្ឋាគារគ្មានផ្សែងបារី កាលពីថ្មីៗនេះ។ ប្រភពដដែល អះអាងថា ពេលនេះសណ្ឋាគារអប្សរាអង្គរ ដល់ពេលវេលាសំរាក ដោយសម្រេចផ្អាកអាជីវកម្មជាផ្លូវការ ចាប់ពីថ្ងៃទី ១ ខែ មករា ឆ្នាំ ២០២០ មូលហេតុនៃការបិទទ្វារនេះ គឺបញ្ហាសេដ្ឋកិច្ច។

ដោយឡែក ងាកមកសារមន្ទីរអង្គរវិញ ដែលវិនិយោគដោយក្រុមហ៊ុនរបស់កូរ៉េខាងជើង មានតម្លៃ ២៤លានដុល្លារអាមេរិក នៅខេត្តសៀមរាប ក៏បានប្រកាសបិទទ្វារជាផ្លូវការផងដែរ។

ក្រៅពីនោះ ភោជនីយដ្ឋាន និងហាងកាហ្វេចំនួន ៦ កន្លែងផ្សេងទៀត ត្រូវបានប្រកាសបិទទ្វារព្រមគ្នា ក្រោយបានលេចរូបរាងកាលពីឆ្នាំ២០១៥។ តាមសេចក្ដីប្រកាសរបស់សារមន្ទីរខាងលើបានសង្កត់ធ្ងន់ថា ថ្នាក់គ្រប់គ្រង បានសម្រេចផ្អាកអាជីវកម្មជាបន្ទាន់ និងបណ្ដោះអាសន្ន ដោយសារពាក់ព័ន្ធនឹងបញ្ហាសេដ្ឋកិច្ច។

សូមបញ្ជាក់ថា កន្លងទៅសារមន្ទីរមួយនេះ ទទួលបានទាំងភ្ញៀវទេសចរជាតិ និងអន្តរជាតិ ចូលទស្សនាជាបន្តបន្ទាប់ ដើម្បីចង់ស្វែងយល់ពីវប្បធម៌ និងអច្ឆរិយរបស់ខ្មែរ ដែលបានសម្ពោធជាផ្លូវការ កាលពីថ្ងៃទី៤ ខែធ្នូ ឆ្នាំ ២០១៥ សាងសង់ឡើងដោយក្រុមហ៊ុនរបស់ប្រទេសកូរ៉េខាងជើង និងការចូលរួមពីអាជ្ញាធរអប្សរា។

សារមន្ទីរ 3D ដំបូងបង្អស់នៅប្រទេសកម្ពុជា មានបំពាក់គ្រឿងបរិក្ខាទំនើបៗដែលអាចបង្ហាញអំពីប្រវត្តិនៃប្រាសាទបុរាណ និងប្រវត្តិនៃព្រះមហាក្សត្រខ្មែរតាមជំនាន់នីមួយៗ តាមរយៈរូបភាព និងវីដេអូជាប្រភេទ 3D។

គួររំលឹកផងដែរថា កាលពីថ្ងៃទី៣១ ថ្មីៗនេះ សណ្ឋាគារផ្កាយ៥នៅភ្នំពេញ ដែលធ្លាប់មានឈ្មោះថា Inter-continental Hotel ដែលជាសណ្ឋាគារមួយទទួលមេដឹកនាំធំៗជាច្រើនរូបនិងប្រារព្ធពិធីធំៗជាយ៉ាងច្រើនអនេក អស់រយៈពេល២៣ឆ្នាំកន្លងមកនេះ ទីបំផុតត្រូវបានបាត់ឈ្មោះ និងបិទទ្វារទៅហើយ ។