កម្ពុជាក្រោម ៖ មានការភ្ញាក់ផ្អើលនៅលើបណ្តាញសង្គមហ្វេសប៊ុកដោយសារតែ មានរូបភាពជាច្រើនសន្លឹកដែលបានបង្ហាញពីវត្តឃោសិតារាម ស្ថិតនៅក្នុងខេត្តពល្លាវ ជាវត្ដមានព្រះវិហារ និងសាលារៀនខ្មែរ ដែលធំជាងគេនៅកម្ពុជាក្រោម។
រូបភាពទាំងស្រុងនៅក្នុងព្រះវិហារនេះត្រូវបានចំណាយពេលអស់ទៅដល់៤ឆ្នាំដើម្បីសម្រេចចេញជារូបរាង និងមានផ្ទៃដីចំនួន ៤២៧,៥ម៉ែត្រការ៉េ កម្ពស់៣៦,៣ម៉ែត្រ ។ព្រះវិហារនេះបានរំលេចក្បូរក្បាច់រចនាផ្កាភ្ញីដ៏ល្អវិចិត្រដែលគួរឲ្យទាក់ទាញនិងចាប់អារម្មណ៍ខ្លាំង ព្រោះព្រះវិហារនេះបានចងក្រងគំនូរស្តីពីពុទ្ធប្រវត្តិចាប់ពីព្រះអង្គទ្រង់ប្រសូតិរហូតដល់ទ្រង់ចូលព្រះបរិនិព្វាន។
មិនត្រឹមតែប៉ុណ្ណោះទេ លើសពីនេះទៅទៀតអក្សរព្យញ្ជនៈខ្មែរបច្ចុប្បន្ន ក៏ត្រូវបានច្នៃរួមបញ្ចូលនៅក្នុងចម្លាក់ទាំងនោះ យ៉ាងគួរឱ្យចាប់អារម្មណ៍ជាទីបំផុត ក៏ដូចជាគួរឱ្យកោតសរសើរនូវឧត្តមគតិស្នេហាវប្បធម៌របស់ប្រជាពលរដ្ឋដែលរស់នៅទីនោះផងដែរ។
